Almatyda fýtzaldan stýdentter arasynda ótken álem chempıonaty máresine jetti. Bir apta aralyǵynda 17 memleketten kelgen sportshylar baq synady. Atalmysh álemdik jarys tarıhynda 500-ge jýyq sportshynyń jınalýy – rekordtyq kórsetkish bolyp otyr. Sondaı-aq baıraqty báseke tarıhynda bizdiń jigitter alǵash ret aqtyq synǵa jetti.  

Fınaldyq kezdesýge kelgen jankúıerler óte kóp. Kópsalaly «Almaty Arena» kesheninde kórermenniń barlyǵy jerlesterimizge qoldaý kórsetýge jınalǵan. Fýtzaldan stýdentter arasyndaǵy álem chempıonatynyń tarıhynda Qazaqstan quramasy alǵash ret aqtyq márege jetip otyr.

Jarys barysynda jınalǵan kórermenderdi sózge tartyp kórgenimizde, biri: «Oıyn jalpy jaqsy júrip jatyr. Biraq qarsylastyń bizdiń komandaǵa qaraǵanda myqty ekeni kórinip tur. Degenmen, bizdiń komandamyz jeńedi degen úmittemiz!», – dep sportshylarǵa qoldaý bildirse, endi biri: «Oıyn óte qyzyqty. Qazaqstan jeńýi kerek. Alǵa, Qazaqstan!», – dep Qazaqstan quramasynyń jeńáske jetetine nyq senim bildirip jatty. 

Ekinshi taımda kórermender bizdiń jigitterimizge kóp úmit artty. Qos qurama óte qyzyqty oıyn kórsetip, qaýipti sátterge de tap bolyp jatty. Dese de, soǵylǵan gol kóp bola qoımady. Tek oıynnyń 38-shi mınýtynda qazaqstandyq qaqpashy Asyljan Álim osy kezdesýdegi sońǵy dopty soqty. Osylaısha, esep 2:4 bolyp, Qazaqstan álem chempıonatynyń kúmis júldegeri atandy.

«Biz jeńilip qaldyq. Kórermen óte kóp jınaldy. Óte ókinishti! Barlyǵyna úlken syı jasap, alǵa shyqqymyz kelip edi. Átteń bolmaı qaldy», – dedi fýtzaldan Qazaqstan erler quramasynyń oıynshysy Arnold Knaýb.

«Fınalda utylǵan soń báribir ókinish sezimi bolady eken. Barlyq jankúıerlerimizge myń alǵys aıtamyz. Qoldaýlaryńyz keremet boldy. Kelesi chempıonatta jeńemiz degen úmittemin», – dedi fýtzaldan Qazaqstan erler quramasynyń qaqpashysy Asyljan ÁLİM.

Fýtzaldan stýdentter arasynda álem chempıonatynda Reseı tórt dúrkin álem chempıony atanǵan. Endi kezekti altyn medal alý arqyly álemdegi eń tıtýldy qurama – Brazılıamen teńesti. Al qola júlde Ýkraına quramasyna buıyrdy.

«Maǵan barlyǵy unady. Týrnırdiń deńgeıi óte joǵary boldy. Qoldaý erekshe sezildi. Barlyq mach óte qıyn ótti. Tórttikke engen barlyq komanda chempıonattaǵy myqtylardyń myqtysy boldy dep sanaımyn», – dedi fýtzaldan Reseı quramasynyń bas bapkeri Sergeı Skorovıch.

Qyzdar arasynda da Reseı quramasy birinshi orynnan kórinse, kúmis medaldi Ýkraına burymdylary qanjyǵalady. Portýgalıa arýlary qola júldege qol jetkizdi.

«Qyzyqty sporttyń kýágeri bolyp otyrmyz. Búgingi basty oıyn bolǵan fınalda qazaqtyń qurama komandasy fınalǵa shyǵyp, óte joǵary deńgeıdegi oıyndy kórsetti, bul bizdiń tarıhymyzda bolmaǵan. Reseı komandasyn alatyn bolsaq, ol 4 ret álemdik chempıonatty jeńgen. Sondyqtan bizdiń qurama komandamyz qazir úlken dárejege kóterilip otyr. Osyndaı oıyndar bizge jıi kerek-aq. Sondyqtan áli de biraz bıikti baǵyndyrarmyz», – dedi Ulttyq stýdentter lıgasynyń prezıdenti Damır Shynybekov.

«Chempıonat alǵash ret jabyq sport kesheninde ótkizildi. Bul Ýnıversıada oıyndarynan qalǵan mura. Qazaqstan bıligi, Almaty qalasynyń basshylyǵy sportty damytýǵa úlken kóńil bóledi. Mundaı dúbirli doda stýdentter, jastar arasynda jıi bolyp turady jáne jalpy buqaralyq sportty damytýǵa úlken serpin beredi degen senimdemin», – dedi Halyqaralyq stýdenttik sport federasıasynyń prezıdenti Oleg Matysın.

Aıta keterligi, álem chempıonaty 19 jáne 26 tamyz aralyǵynda Almaty Arena jáne Halyk Arena muz saraıynda ótti. Oǵan 17 elden 25 komanda – 454 stýdent qatysyp otyr. 16 jyldan beri ótip kele jatqan báseke tarıhynda bıylǵy qatysýshylardyń sany rekordtyq mejege jetti. Kelesi álem chempıonaty eki jyldan soń Polshanyń Poznan qalasynda ótetin bolady.