Astana qalasynyń İİD Jergilikti polısıa qyzmetiniń tabıǵatty qorǵaý polısıasynyń qyzmetkerleri azamattardyń stıhıalyq qoqys qaldyqtaryn tógýine jol bermeý maqsatynda kúndelikti belgili bir is-sharalardy júrgizip otyrady. Osy rette tártip saqshylary qoqys qaldyqtary kóptep tógiletin jerlerdi tekserýde, dep habarlaıdy elorda ákimdiginiń resmı saıty.
Tekserý jumystarynyń barysynda jergilikti polısıa qyzmeti tabıǵatty qorǵaý polısıasynyń qyzmetkerleri Ulytaý kóshesiniń boıyndaǵy belgilenbegen orynda «Kamaz» markaly avtokóliktiń 49 jastaǵy júrgizýshisiniń batpaqty tókkenin anyqtady. Quqyq buzýshy QR ÁQBtK-niń 505 baby «Qalalar men eldi mekenderdiń aýmaqtaryn abattandyrý qaǵıdalaryn buzý…» boıynsha ákimshilik jaýapkershilikke tartyldy. Oǵan 10 AEK (24 050 teńge) mólsherinde aıyppul salyndy.
«Al 59 jastaǵy «Howo» markaly avtokóliktiń júrgizýshisi Turan kóshesinde belgilenbegen jerde beton qaldyqtaryn tókkeni úshin QR ÁQBtK-niń 505 baby «Qalalar men eldi mekenderdiń aýmaqtarynabattandyrý qaǵıdalaryn buzý…» boıynsha ákimshilik jaýapkershilikke tartyldy. Oǵan salynǵan aıyppuldyń mólsheri 20 AEK (48 100 teńgeni) quraıdy», - delingen habarlamada.
Aıta keteıik, jyl basynan beri Astana qalasy İİD JPQ tabıǵatty qorǵaý polısıasynyń qyzmetkerleri QR ÁQBtK-niń 505 baby «Qalalar men eldi mekenderdiń aýmaqtaryn abattandyrý qaǵıdalaryn buzý…» boıynsha 558 júrgizýshini anyqtap, ákimshilik jaýapkershilikke tartty. Salynǵan aıyppuldyń jalpy somasy 14 mln 600 myń teńgeden asady.
