8-sáýir kúni Almaty qalasyndaǵy Stýdentter saraıynda belgili jýrnalıs, kompozıtor Serik Janbolattyń 50 jasqa tolýyna oraı shyǵarmashylyq keshi ótedi. Keshke qazaq estradasynyń juldyzdary, dástúrli án óneriniń darabozdary qatysady.
Serikbek Meırambekuly Janbolat 1964 jyly Shyǵys Qazaqstan oblysy Abaı aýdanynda dúnıege kelgen.1981 jyly aýdandyq «Sovhoz týy» gazetinde jýrnalısik qyzmetin bastap, sodan beri 30 jyldan astam ýaqyt boıy teledıdar men gazet salasynda taban aýdarmaı eńbek etip keledi. Bilikti jýrnalıs, isker uıymdastyrýshy Serikbek Janbolattyń avtorlyǵymen Qazaq teledıdary salasynda ár kezderi «Ar» stýdıasy, «Jigittiń sultany», «Qyz syny», «Taıbýryl» telebáıgesi, «Úkili úmit» túrki ánderiniń baıqaýy syndy sátti jobalar dúnıege kelip, teledıdardyń altyn qoryn tolyqtyrdy.
1998 jyly «Habar» agenttiginde «Sálem, Qazaqstan» tańǵy aqparattyq-saýyq baǵdarlamasyn ashyp, Aqparattyq dıreksıanyń prodúseri, «Jeti kún» jáne «Betpe-bet» saıası-analıtıkalyq baǵdarlamalarynyń redaktory ári júrgizýshisi boldy. Sondaı-aq Qazaqstan respýblıkasynyń Prezıdentiniń halyqpen alǵashqy tikeleı efır arqyly suhbatyn da osy Serikbek Janbolat júrgizgen bolatyn. Odan keıin Serikbek Janbolat Qazaqstan Ulttyq Arnasy bas dırektorynyń birinshi orynbasary qyzmetin atqaryp júrgen kezde tamasha uıymdastyrýshylyq qabiletimen qosa, saıasattanýshy ári ekonomıkalyq taldaýlarǵa beıim maman retinde jańashyldyq kózqarastaǵy jańa zaman jýrnalısıkasyn qalyptastyrýǵa erekshe úles qosty. Sol kezde búkil qazaq kórermenderiniń kózaıymyna aınalǵan «Kókpar» pikirtalas, oısaıys baǵdarlamasy reıtıńi eń joǵary baǵdarmalardyń biri boldy. Teledıdar salasynda eńbek etken jyldary Serikbek Janbolat jalpy qazaq teleóner salasynda baǵdarlama júrgizýshileriniń ózindik mektebin qalyptastyrýǵa uıytqy boldy.
Serikbek Janbolattyń sheber ári jańashyl uıymdastyrýshy ekeni ásirese 2004 jyly «Aıqyn» respýblıkalyq gazeti dúnıege kelgen kezde anyq baıqaldy. Joq jerden jańa aqparattyq baǵyttaǵy zamanaýı kúndelikti shyǵatyn gazet týǵyzý, onyń alǵashqy bas redaktory retinde aqparat aıdyndaǵy ornyn izdeý, ózi basqarǵan úsh jarym jyl ishinde respýblıkadaǵy eń irgeli basylymnyń birine aınaldyrýy – Serikbek Janbolattyń biliktiligin kórsetse kerek. Osy az ǵana ýaqyt ishinde «Aıqyn» gazeti Qazaqstan Respýblıkasy Prezıdentiniń, Jýrnalıser Akademıasynyń «Altyn juldyz» syılyqtaryn jeńip aldy.
2008 jyldyń qazan aıynan bastap respýblıkalyq qoǵamdyq-saıası aqparattyq «Alash aınasy» gazetiniń bas redaktorlyǵyna taǵaıyndalyp, taǵy bir jańa turpattaǵy zamanaýı basylymdy basqardy. Gazet dúnıege kelgen jyly-aq Mádenıet jáne aqparat mınıstrliginiń «Jyl jańalyǵy», odan keıin qatarynan eki jyl «Úzdik basylym» nomınasıalarymen marapattaldy. Búgin sol basylym jańa turpattaǵy portal retinde elimizdiń aqparat keńistigindegi tanymal, bilikti de bedeldi basylymǵa aınaldy.
Serikbek Janbolat tarıhı-tanymdyq derekti fılmder túsirý baǵytynda da úlken eńbek etip kele jatqan jýrnalıs. Onyń Qazaqstan Respýblıkasynyń tuńǵysh Prezıdenti N. Nazarbaev jaıly «Bizdiń tańdaǵanymyz birinshisi» derekti fılmi kórermender men mamandar tarapynan laıyqty baǵasyn aldy. Jas memleketimizdiń alǵashqy qadamdary men onyń kemeldený jolyndaǵy Elbasynyń zor eńbekterin pash etetin fılm Qazaqstan Ulttyq Arnasynyń efırinen birneshe márte kórsetildi. Serikbek Janbolattyń aqıqatqa jol ashqan Shákárim jaıly «Men jaý emespin», «Muqaǵalıdyń shyndyǵy», «Qazaqtyń qara balasy» atty derekti fılderi óz tarıhymyzdy tanýǵa súbeli úles qosqan salmaqty týyndylardyń qataryna qosyldy.
Sol sıaqty Serikbek Janbolat «Shyǵysym meniń!», «Semeıim erkem», «Shyńǵystaý arýy» tárizdi elge keń taraǵan birneshe ánderdiń avtory.
Belgili telejýrnalıst, «Aıqyn» jáne «Alash aınasy» gazetteriniń negizin qalaýshylardyń biri, derekti kınoshy, sazger, bilikti uıymdastyrýshy Serikbek Janbolat Qazaqstan Respýblıkasy Prezıdenti syılyǵynyń laýreaty jáne Prezıdent alǵys hatynyń eki márte ıegeri. Qazaq jýrnalısıka salasyna sińirgen eńbegi úshin «Mádenıet qaıratkeri» tósbelgisi tabys etildi. Qazaqstan Jýrnalıser Akademıasynyń akademıgi.
