Almaty ákimi kóshelerdegi qaıta jóndeý jumystary barysyna toqtalyp, negizgi aımaqtar boıynsha jospardy oqý jylyna deıin bitirýge ýáde berdi.
Almatylyq ustazdardyń tamyzdaǵy jıynyn paıdalanyp, qala ákimi turǵyndardyń tózimdiligine rızashylyǵyn bildirdi.
«Árıne, jóndeý jumystary jaısyzdyq týǵyzady. Biraq munyń bári qalalyqtardyń ıgiligi úshin jasalýda. Jaǵdaıǵa túsinistikpen qarap, shydamdylyq tanytqandaryńyzǵa rahmet. Negizgi abattandyrý aımaqtary birneshe kúnnen keıin, jańa oqý jylynyń bastalýy qarsańynda aıaqtalady. Aǵymdaǵy sharýalardy qala kúnine deıin bitirip qalady. Múmkindik paıdalana otyryp, barlyǵyńyzdy merekeni birge toılaýǵa shaqyramyn»,-dedi Almaty ákimi B.Baıbek.
Onyń aıtýynsha, ortalyq saıabaq, zoobaq, Abaı alańy, eki temirjol vokzaly, «Saıran» avtovokzaly men jaǵalaýy, Baým baǵy týrısik aımaq retinde jańa sıpat alýda.
Sondaı-aq qala basshysy Almatyǵa jańadan qosylǵan aýdandarǵa toqtalyp ótti.
«Nebári 4 jyl buryn qurylǵan Naýryzbaı aýdanynyń damýyna 61 mlrd teńge quıylǵan bolatyn. Eseptesek jyl saıyn 15 mlrd jumsalypty. Munda jańa ákimshilik ortalyq, áleýmettik obektiler - 2 mektep pen 4 aýrýhana , Qazposhta, bankter men zeınetaqy tóleıtin ortalyq salynǵan. HQO qyzmetin kúnine myńdaǵan adam paıdalanady. Jaqyn arada 220 kóshege asfált tóselip, 123 shaqyrymdyq sý qubyry men 80 shaqyrymdyq káriz júıesi ornatyldy. Bul josparlanǵan júıeniń úshten bir bóligi ǵana. 58 shaqyrym jaıaýjoldyń 30 paıyzy aıaqtalyp, 37 shaqyrym jańa aryq júıeleri jasaldy. Jalpy kólemi 55 shaqyrym ishki jaryqtandyrý kezinde kóshelerdiń 25 paıyzy qamtyldy. Halyqtyń 95 paıyzy gazben jabdyqtaldy. Qarǵaly ózeni ańǵary janynan aýdan turǵyndary úshin demalatyn oryn jasadyq»,-dedi ol.
