Almaty Jer qatynastary basqarmasy basshysynyń orynbasary Ardaq Samambetov memleket qajettiligi qaıtarylyp alynǵan jerler men bolashaqta qaıtarylatyn jer telimderi týraly aıtty.

«Bizge Naýryzbaı aýdanyndaǵy «Qalqaman» metro stansasynyń qurylysy úshin jer telimderin qaıtaryp alý jóninde ótinim keldi. Oǵan shamamen 150 ýchaske jatady. Aralap, qajet qujattar men materıaldardy jınaýǵa qatysty jumystar júrgizilip jatyr. Árıne, múlikti baǵalaý úshin quqyq belgileıtin qujattardy alyp, tekseris júrgizý qajet. Shamamen úılerdiń 50% aralap shyqtyq, materıaldar paketin jınadyq. Menshik ıeleriniń barlyǵy qujattaryn berýge kelisim bildirmeıtindikten, olardy ártúrli kadastrlardan, ádilet organdary men muraǵattan aldyrtýǵa májbúr bolyp otyrmyz», - dedi Ardaq Samambetov.

Budan bólek, Ardaq Samambetov kólik jol aıyryqtarynyń qurylysy úshin alynatyn jer ýchaskelerine jekeleı toqtaldy. T.Rysqulov-Qulja jolyna arnalǵan jol aıyryǵyna jerlerdi ıelikten qaıtarýl aıaqtaldy. Basqarma 3 mlrd teńgege jer telimderin satyp aldy.

«Emsova kóshesindegi jol aıyryq boıynsha áli de jumystar jasalýda. Onyń boıyndaǵy jer ýchaskeleriniń 70% satyp alýdy aıaqtadyq. Jalpy 102 ýchaskeniń alpys besin 3,3 mlrd teńgege satyp aldyq. 37 ýchaske boıynsha jumys júrgizilýde. İ.Jansúgirov-N.Nazarbaev jol aıyryǵynda estakadanyń qurylysy júrip jatyr. Telimderdi ótken jyly satyp ala bastadyq. Jalpy 45 ýchaskeniń 44-ine 1,7 mlrd teńge berildi. Bir ýchaskede áli jumystar atqarylyp jatyr, alaıda ol jer bos. Oǵan qatysty is Joǵarǵy sotta qaralýda», - dedi A. Samambetov.

Sondaı-aq, Abaı dańǵyly men Momyshuly kóshesiniń jol aıyryǵy syndy iri jobalarǵa jer ýchaskelerin ıelikten shyǵarý máselesi qarastyrylǵan. Shamamen 300 jer telimi ıelikten shyǵarylady, olardyń 104-ine qaýly qabyldandy.

Almatydaǵy BRT úshin 32 jer ýchaskesi ıelikten shyǵarylǵan edi, olardyń jeteýine qatysty másele áli de sheshimin tappady.