Qazaqstan Mánma úkimetin eldegi rohındja-musylmandarynyń jaǵdaıyna baılanysty problemalardyń túbegeıli sebepterin joıýǵa barlyq kúsh-jigerin jumsaýǵa shaqyrady, dep habarlaıdy Qamshy.kz aqparat agenttigi Syrtqy ister mınıstrliginiń baspasóz qyzmetine silteme jasap.
Bul týraly Qazaqstannyń Birikken Ulttar Uıymy janyndaǵy Turaqty ókili Qaırat Omarov BUU Qaýipsizdik Keńesiniń Mánmadaǵy ahýal boıynsha ótken otyrysynda málimdedi.
Kezdesý barysynda BUU Bas hatshysy Antonıý Gýterrısh jáne BUU Bosqyndar isi jónindegi agenttiginiń izgi nıetti elshisi, aktrısa Keıt Blanshett Mánmadaǵy rohındja-musylmandarynyń jaǵdaıy týraly baıandamalaryn jasady.
Qazaqstan Elshisi dál osydan bir jyl buryn Mánmadan Bangladeshke 700 myńnan astam rohındja-musylmandary qashqan kezde halyqaralyq qoǵamdastyq eń iri gýmanıtarlyq apattardyń birine kýá bolǵanyn atap ótti. «Eń tańqalarlyǵy–rohındja-bosqyndardyń 60 paıyzy úılerinen ketýge májbúr bolǵan jáne biz sáýir aıynda Bangladeshte ózimiz kórgenimizdeı bosqyndar lagerlerinde óte qıyn jaǵdaıǵa tap bolyp otyrǵan balalar», - dedi Q.Omarov.
Qazaqstan BUU jáne barlyq gýmanıtarlyq áriptesterdiń rohındja-bosqyndarǵa azyq-túlik, baspana, dári-dármekter, sý jáne basqa da kómek kórsetý quraldaryn usynýǵa baǵyttalǵan kúsh-jigerin joǵary baǵalaıdy.
Ústimizdegi jyldyń sáýir aıynda Qazaqstan Úkimeti Bangladeshtegi Koks-Bazar qalasynyń mańynda ornalasqan rohındja-bosqyndarǵa 500 myń dollar kóleminde gýmanıtarlyq kómek kórsetip, ony olar turatyn jerlerge jetkizdi.
Mánmadaǵy qazirgi jaǵdaı týraly aıta kele, Q.Omarov BUU-nyń málimetteri boıynsha etnıkalyq rohındja halqy ókilderiniń júrip-turý bostandyǵyna, sondaı-aq bilim alý, densaýlyq saqtaý jáne ómirlik daǵdylaryna qol jetkizýge qatań shekteýler áli qalýda ekenin atap ótti. «Rohındja-bosqyndar kepildikti qaýipsizdikti jáne osy máseleler boıynsha naqty progresti kórip turǵan kezde ǵana olar elge oralady», - dep basa aıtty Qazaqstan elshisi.
Qazaqstannyń Turaqty ókili sondaı-aq Mánmadaǵy Rohındja halqynyń quqyqtaryn buzýshylyqtardy tergeý boıynsha táýelsiz komısıa qurýyn tatýlastyqqa jáne ótpeli ádilettilikke baǵyttalǵan negizgi qadamdardyń biri retinde atady. Sonymen qatar, ol Komısıaǵa musylman qaýymdastyǵynyń ókilin qosý onyń bedelin edáýir arttyryp, «kópirlerdi salýǵa» kómektesýge múmkindik bere alatyndyǵyn atap ótti.
Jalpy, BUU Qaýipsizdik Keńesiniń músheleri rohındja-bosqyndardyń problemalaryn Mánmadaǵy burynǵy turǵylyqty jerlerge qaýipsiz, qaıyrymdy jáne óz erkimen oralýy úshin tez arada sheshý qajettigi týraly biraýyzdy boldy.
