Memleket basshysy Katar Memleketiniń damý qorynyń qoldaýymen salynǵan №85 jańa mektep-lıseıdiń oqý kabınetterin aralap kórip, onyń materıaldyq-tehnıkalyq bazasymen tanysty, sondaı-aq oqýshylarmen áńgimelesti.
Nursultan Nazarbaev jýrnalıser aldynda sóılegen sózinde elimizdiń barsha oqýshylaryn, ustazdar qaýymy men ata-analardy Bilim kúnimen quttyqtap, osy saltanatty is-sharanyń elordada boı kótergen jańa oqý ordasynyń qabyrǵasynda ótýiniń sımvoldyq máni bar ekenin aıtty.
– Búginde respýblıka boıynsha 181 mektep salynyp jatyr. 23 mekteptiń qurylysy aıaqtalyp, alǵashqy oqýshylaryn qabyldady. Qazaqstan boıynsha 7 myńnan astam mektep 3 mıllıon oqýshyǵa esik ashty. Sonyń 350 myńy – mektep tabaldyryǵyn alǵash ret attaıdy, – dedi Qazaqstan Prezıdenti.
Elbasy XXI ǵasyrdaǵy joǵary tehnologıalyq álemde ilim-bilim ınovasıanyń kilti jáne Qazaqstan damýynyń basty resýrsy sanalatynyn aıtyp, memleketimiz bilim berý salasyna zor mán berip otyrǵanyna toqtaldy.
Memleket basshysy fýnksıonaldyq saýattylyqty damytýǵa baǵyttalǵan orta bilimniń jańartylǵan mazmunyna kóshý qajettiligin atap ótip, oqýshylardyń qazirgi jaǵdaıda alǵan bilimderi men mashyqtaryn tájirıbede qoldana alýǵa tıis ekenine nazar aýdardy. Bul pedagogtiń biliktiligi men kásibıliginiń joǵary deńgeıde bolýyn talap etedi.
– Memleket pedagogtardy daıarlaý, bilim salasyndaǵy eńbekaqy júıesin jetildirý jóninde júıeli jumys júrgizip keledi. Osy oqý jylynan bastap attestasıadan ótken muǵalimderdiń jalaqysy jańa júıe boıynsha 30-50 paıyzǵa artady, – dedi Qazaqstan Prezıdenti.
Nursultan Nazarbaev zamanaýı tehnologıa dáýiri men Qazaqstannyń úshinshi jańǵyrýynyń talaptary balalarǵa sapaly bilim berip, olardyń taldaý jáne kreatıvti damý qabiletin qalyptastyrý úshin jańa mindetter qoıatynyn atap ótip, oqýshylardyń aqparattyq tehnologıa men shet tilderin erkin meńgerýi qajet ekenine nazar aýdardy.
1200 orynǵa arnalǵan bilim mekemesinde 48 kabınet bar. Jaratylystaný-matematıka baǵytyndaǵy №85 mektep-lıseıdiń oqytý prosesi memlekettik bilim standartynyń talaptaryna saı ınovasıalyq tehnologıalardy paıdalaný arqyly memlekettik jáne orys tilderinde júrgiziledi.
