Elbasy depýtattar aldynda sóılegen sózinde halyq qalaýlylaryn Parlamenttiń jańa sesıasynyń ashylýymen quttyqtap, altynshy shaqyrylymnyń depýtattyq korpýsy joǵary kásibılik kórsetip, Úkimetpen ózara úılesimdi yqpaldastyq tanytqanyn atap ótti.

– Parlamenttiń úshinshi sesıasynyń qorytyndysy boıynsha 87 zań qabyldandy, sonyń ishinde men jarıalaǵan «Bes áleýmettik bastamanyń» tıisti normatıvtik quqyqtyq negizi qalyptasty. Bul alty mıllıonnan astam qazaqstandyqtyń ál-aýqatyn arttyryp, ósip-órkendeýimizdiń basty sharty sanalatyn halqymyzdyń birligin nyǵaıtýǵa múmkindik beredi, – dedi Nursultan Nazarbaev.

Memleket basshysy elimizdiń ekonomıkalyq jetistikterine arnaıy toqtaldy.

– Qazaqstandaǵy ishki jalpy ónim 4 paıyzǵa artty, ınflásıa 5,9 paıyzǵa tómendedi, ınvestısıa kólemi 24 paıyzǵa ósti. Ekonomıka men qoǵamnyń tıimdi jańǵyrýyna qajetti jaǵdaılar jasalýda. Biz byltyrdan bastap ekonomıkanyń álemdegi ortasha damý qarqynynan oza bastadyq. Óńdeý ónerkásibi, kólik jáne qyzmet kórsetý salalary sıaqty shıkizattyq emes sektorlar ekonomıkalyq ósimniń qozǵaýshy kúshine aınaldy, – dedi Qazaqstan Prezıdenti.

Elbasy ári qaraı dáıekti áleýmettik-ekonomıkalyq damý úshin sapaly zań shyǵarý jumysyn jalǵastyrý qajet ekenin aıtty.

– Ózin-ózi jumyspen qamtyǵandardy medısınalyq jáne áleýmettik saqtandyrý, sondaı-aq zeınetaqymen qamtý júıesine tartý – mańyzdy máselelerdiń biri. Tıisti ózgeristerdi osy jyldyń sońyna deıin qabyldaý qajet. Bul, ásirese, mindetti áleýmettik medısınalyq saqtandyrý júıesine kóshý, medısınalyq kómektiń kepildik berilgen kóleminiń jańa modelin engizý, qoǵamdyq densaýlyqty saqtaý máselelerin jáne medısınalyq mekemelerde korporatıvtik basqarý júıesin jetildirý jumystaryna baılanysty bolǵandyqtan asa ózekti sanalyp otyr, – dedi Nursultan Nazarbaev.

Memleket basshysy qurylystyń qarqyndy damýyna baılanysty turǵyn úı-kommýnaldyq sharýashylyǵy salasynda turǵyndardy qanaǵattandyrmaıtyn kúrmeýli máselelerdiń bar ekenin atap ótip, jalpy úı sharýashylyǵy basqarmasynyń túsinikti ári tıimdi júıesin qurý kerektigin, sonymen qatar bul júıeniń qyzmet kórsetýshi kompanıalar men turǵyndar arasyndaǵy qarym-qatynastyń ashyqtyǵy qaǵıdatyna, sondaı-aq qarajat shyǵyny men monopolıserdiń jaýapkershiligin baqylaýǵa negizdelýi tıis ekenin aıtty.

Nursultan Nazarbaev orta jáne shaǵyn bıznesti damytý barysyndaǵy oń úrdisterge toqtalyp, týrızm salasynyń kásipkerlikti damytýǵa tyń serpin berýi qajet ekendigin atap ótti.

– Úkimetke Týrızmdi damytýdyń 2023 jylǵa deıingi memlekettik baǵdarlamasyn ázirleý tapsyryldy. Bul qujat jyl sońyna deıin qarastyrylyp, qarjylyq turǵydan qajetti zańnamalyq baza arqyly bekitilýge tıis. Sonymen qatar, Parlamentte memlekettik satyp alý jáne kvazımemlekettik sektor úshin satyp alý máselelerine qatysty zań jobasy bar. Osy qujat atalǵan prosesti jeńildetýge, onyń tıimdiligin arttyrýǵa, sybaılas jemqorlyq qaterin tómendetýge, basym baǵyttardy iske asyrý úshin qarjy bólýge jáne bıznes ahýalyn jaqsartýǵa múmkindik beredi, – dedi Qazaqstan Prezıdenti.

Memleket basshysy agroónerkásip kesheni salasyndaǵy zańnamany, sonyń ishinde saqtandandyrý, agrarlyq qolhattardy engizý, nesıelik seriktestikterdi damytý, sondaı-aq veterınarıa salasynda baqylaý júıesin ońtaılandyrý máselelerin odan ári jetildirý qajettigine toqtaldy.

– Qoǵamdyq sanany jańǵyrtýǵa arnalǵan «Rýhanı jańǵyrý» baǵdarlamasynyń mańyzdy mindetteriniń biri tarıhı-mádenı murany saqtap, keńinen tanytýdy qamtamasyz etý bolyp sanalady. Tıisti zań jobasyn qabyldaý úzdik álemdik tájirıbege sáıkes tarıhı ári kıeli nysandardy tıimdi damytýǵa, qorǵaýǵa septigin tıgizedi, – dedi Nursultan Nazarbaev.

Shymkentke repýblıkalyq mańyzy bar qala mártebesi berilýine jáne Túrkistan oblysynyń qurylýyna baılanysty Qazaqstan Prezıdenti Parlamenttiń qaraýyna qaıta qurylǵan ákimshilik-aýmaqtyq birlikterdiń tolyqqandy jumysyn qamtamasyz etýge baǵyttalǵan zań jobalary engiziletinin jáne olardyń shuǵyl qaralyp, qabyldanýy kerektigin aıtty.

Jıyn sońynda Memleket basshysy depýtattardy sesıanyń ashylýymen taǵy da quttyqtap, Qazaqstannyń turaqty ári qarqyndy damý isinde odan ári tabysqa jete berýine tilektestik bildirdi.