Aqtóbede 52 Ózbekstan azamatynyń ómirin jalmaǵan avtobýstaǵy órtke qatysty sot otyrysy bastaldy. Alǵashqy otyrysqa qatysýǵa kórshi elden marqumdardyń týystary da keldi. Olar proses bastalmaı jatyp-aq jaqyndarynyń tirideı janyp ketkenine senbeıtinin málimdedi. Al aıyptalýshy dep tanylǵan avtobýstyń úsh júrgizýshisiniń qorǵaýshylary olardy aqtap shyǵýdy talap etti. 

Osydan segiz aı buryn Aqtóbe oblysynda avtobýsta tirideı janyp ketken Ózbekstannyń 52 azamatynyń barlyq jaqyndaryna jábirlenýshi retinde sottan shaqyrtý jiberilipti. Biraq jerdiń shalǵaılyǵyna baılanysty basynda jolǵa Ferǵanadan  shyqqan 25 adamnyń Aqtóbege 11-i ǵana bılet taýyp jetken. Endi  sottyń aqyryna deıin osynda bolamyz dep otyr. 

"11 adam bolyp qazir páter jaldap jatyrmyz. Segiz aıdan beri tergeýdiń qalaı júrgeninen, kimdi aıyptap jatqanynan beıhabarmyz. Oqıǵanyń qalaı bolǵanyn bilgimiz keledi. 19 jastaǵy ulym qyrshyn ketti", — deıdi Baqtıar Ǵarıpov.

Proses bastalmaı jatyp, sýdıa qaıta-qaıta úzilis jarıalaýmen boldy. Óıtkeni jábirlenýshiniń birde-biri qazaqsha túsinbeıdi eken. Al ózbekshege aýdaratyn tárjimashy Aqtóbede atymen joq. Sondyqtan orys tiline aýdaryp beretin bolyp kelisti. Kórshi elden kelgenderdiń barlyǵy derlik jaqyndarynyń avtobýsta tirideı janyp ketkenine senbeıdi, dep habarlady KTK.

"Bul bir bolyp jatqan qoıylym sıaqty. Uldarymyzdyń tabytyn ákelgen kezde bizge ashtyrmady. DNK saraptamasynyń nátıjesin kórsetpedi. Jaqyndarymyzdyń avtobýsta janyp ketkeni ras bolsa, nege tergeý kezinde dálel keltirmedi?", — dep atap ótti  Oborjon Hakımov.

Jábirlenýshilerdiń kúdikten kúıinetindeı jaǵdaılary bar. Óıtkeni, marqumdardyń keıbiriniń uıaly telefondary osy kúnge deıin qosýly tur eken. 

"Osynda qınalyp áreń jettim. Ulym men nemeremdi izdep keldim. Olardyń ólgenine senbeımin. Óıtkeni uıaly telefondary áli kúnge deıin istep tur. Qońyraý soqsań eshkim kótermeıdi. Bul jaǵdaıdy qalaı túsinemiz? Adam órtengende, uıaly telefondary da janyp ketýi kerek qoı", — dep ashyndy Iýldýzhon Ǵanıeva.

Endi oqıǵanyń qalaı bolǵanyn avtobýs órtengende tiri qalǵan úsh júrgizýshi aıtyp berýi kerek. Qazir olar aıyptalýshy retinde qamaýda otyr. Olardan bólek sotqa Shymkenttegi avtopark basshysy men mehanıgi jaýap berýge qolhatpen qatynap júr. Tek órtengen avtobýstyń qojaıyny joq. Oǵan halyqaralyq izdeý jarıalanǵan. Qorǵaýshylar oqıǵanyń anyq-qanyǵyn anyqtaý úshin eń aldymen avtobýsta tiri qalǵan ózbekstandyq eki jolaýshyny tyńdaý kerek dep otyr. 

"Týystan aıyrylǵan ońaı emes. Biraq úsh júrgizýshini kinálaı berýge de bolmaıdy. Bul jerde eki kýáger bar ǵoı. Ózbekstan azamaty. Durys pa? Sol adamdar shaqyrtylýy kerek edi", — deıdi aıyptalýshynyń advokaty Nurshat Pernebekova.

Segiz aı buryn avtobýsta aman qalǵan eki Ózbekstan azamaty sot otyrysyn  ózderin qatystyrmaı júrgizýge aryz bergen. Biraq olardyń kýálik etýin qos tarap ta talap etip otyr. Endi olardyń proseske qatysý, qatyspaýyn sot sheshedi.