Búgin almatylyqtar Konstıtýsıa kúnin atap ótip jatyr. Qalanyń Jetisý aýdany qasterli meıramdy barsha turǵynymen birge «Gúlder» saıabaǵynda toılady. Bul kúnge arnaıy konserttik baǵdarlama daıyndalyp, deneni shynyqtyratyn sporttyq sharalar uıymdastyrylǵan. 

Sondaı-aq, zań salasynda aıanbaı eńbek etip júrgen aýdan qyzmetkerleri marapattaldy. Oǵan qosa, bilim kúni qarsańynda 350-den astam az qamtylǵan otbasy balalaryna mektepke qajetti sómke men jabdyqtar tegin taratyldy. 4 myńǵa jýyq halyqtyń basyn qosqan dýman keshke deıin jalǵaspaq.  

«Ata zań. Odan artyq qasterleıtin zań joq. Sondyqtan, barshańyzdy shyn júrekten quttyqtaımyn! Elimiz aman, jurtymyz tynysh bolǵaı! Búgin tań atpastan 30 shaqty ardagerimiz osy jerde «Belsendi uzaq ǵumyr» baǵdarlamasynyń aıasynda ý-shýmen aınalysyp jatyr. Dál qazir skandınavtyq júgirý ótip jatyr. Asyq atý, qazaqtyń ulttyq oıyndary da qatar ótýde», – dedi Almaty qalasy Jetisý aýdany ákiminiń orynbasary Vácheslav Vavılın.

Merekelik kóńil-kúı Áýezov aýdanynda da óte kóterińki boldy. Búgin aýdanda turatyn qos ana kúmis alqa ıelenip, qýanyshqa keneldi. Al 16 jasqa tolǵan on shaqty jasóspirimge alǵashqy tólqujat tabystaldy. Halyq basty qujattyń qundylyǵyn jete túsinip, táýelsiz memleket bolyp qalyptasýymyzǵa Ata Zańnyń úlesi kóp dep biledi. Sondyqtan, quqyǵymyzdy ózgege taptatpaı, eńse tiktedik deıdi.

«Barsha qazaqstandyqtardy jáne Almaty turǵyndaryn, Áýezov aýdanynyń turǵyndaryn búgingi Konstıtýsıa kúnimen shyn júrekten quttyqtaımyz. Osyndaı jas balalarymyzdan bastap, úlken býyn azamattarymyzǵa deıin osy zańymyzdy árqashanda qoldanyp, qaster tutyp júrýge, sol zańdy saqtap júrýge shaqyramyn. Al aýdanymyzǵa bir adamdaı eńbek sińirip, úles qosyp júrgen azamattar aýdan ákiminiń qurmet gramotasyn aldy», – dedi Almaty qalasy Áýezov aýdany ákiminiń orynbasary Dastan Qaıratuly.