Almatyda tuńǵysh Halyqaralyq deńgeıdegi «ALMATY FILM» kınofestıvali boldy. Oǵan álemniń ár túkpirinen kelgen kınogerler qatysyp, shoqtyǵy bıik fılmder anyqtalmaq. Óner báıgesi qala ákimdiginiń qoldaýymen qyrkúıektiń 15 men 19 aralyǵynda ótedi.

Kınofestıval birinshi ret uıymdastyrylyp jatqanyna qaramastan, oǵan qatysý úshin 300-ge jýyq fılm kelip túsipti. Biraq negizgi konkýrsqa eń myqty degen 10 kartına iriktelinip alynǵan. Al baıqaýdan tys baǵdarlamada túrli seksıa boıynsha 21 fılm kórsetilmek. Qazylardy tánti etip, úzdik shyqqan Gran-prı ıesine 3 mln teńge beriledi. Al «Úzdik rejıser» nomınasıasy 2 mln teńgeni qanjyǵasyna baılaıdy. «Úzdik akter» men «Úzdik aktrısa» jáne «Qazylar alqasynyń arnaıy júldesi» nomınasıalaryna 1 mıllıon teńge qarastyrylǵan.

Sondaı-aq, festıvál aıasynda arnaıy pıchıng joba uıymdastyrylmaq. Onda kez-kelgen adam óz senarıin joldaıdy. Úzdik shyqqan senarı «ALMATY FILM» kınofestıvali qorynan qarjylandyrylyp, túsiriletin bolady.

«Pıchıng jobada búgingi kúni 69 senarı bar. Qazir solardy qarastyryp jatyrmyz, ishinen jeńimpazdy anyqtaǵannan keıin, qorymyz Alla buıyrtsa, sol senarıdi alyp, qarajat bólip, kıno túsiremiz. Onyń tusaýkeserin kelesi jyly osy festıválde jasaımyz», – dedi «ALMATY FILM FESTIVAL» prezıdenti Aqan Sataev.

Kınofestıval sheńberinde ártúrli bıznes-forýmdar uıymdastyrylyp, tanymal kınogerler óz sheberlik sabaqtaryn ótkizedi. Al kil myqty kınogerlerden quralǵan qazylar alqasyna reseılik kınorejısser Sergeı Bodrov tórelik etedi.

Sharanyń ashylý jáne jabylý saltanaty Respýblıka saraıynda ótkenimen, kórsetilimder qos kınoteatrda qatar júredi. Kórsetilimderdiń barlyǵy tegin. Tek kórermenge kınofestıvaldiń saıtynan aldyn ala akredıtasıadan ótý qajet. Aıta ketsek, atalmysh kınofestıvaldi bıyl Kann kınofestıvalinen júlde alǵan «Aıka» fılmi ashady.

«Bul kınofestıvaldiń ıdeıasy óte tamasha. Biz Qazaqstan kınoındýstrıasyna halyqaralyq jobalardy tartyp, Almatyny álemge keńirek tanytamyz. Qala ımıji bolatyn bul shara jyl saıyn ótkiziledi degen jospar bar. Endi «Aıka» fılmi týraly aıtsam, týyndy bıyl Kann kınofestıvalinde úzdik shyǵyp, aktrısamyz Samal Eslámova «úzdik aktrısa» nomınasıasyn jeńip aldy. Fılmniń kórsetilimin kóp kórermen taǵatsyzdana kútip júr. Biraq birden eskerte ketsem, bul avtorlyq turǵyda túsirilgen, naǵyz óner týyndysy. Popkorn alyp tamashalaıtyn arzanqol dúnıe emes. Sondyqtan avtorlyq fılmder kórip úırenbegen jastarymyzǵa bul fılm túsiniksizdeý bolýy múmkin ekenin aldyn ala aıtqym keledi», – dedi «ALMATY FILM FESTIVAL» qazylar alqasynyń múshesi Gúlnár Sársenova.