Almatyda aýdandyq İshki ister basqarmalarynyń qorshaýlary biryńǵaı stılde bolady. Mundaı qorshaý qazir Naýryzbaı aýdandyq İshki ister basqarmasynda tur. Oǵan qosa, front-keńseler de boı kóteredi. Áınekten jasalǵan qabyldaý kabınetterine kelgen turǵyndarǵa qylmystyq jáne ákimshilik polısıa qyzmetkerleri keńes beredi. Osylaısha azamattar tártip saqshylardan kókeıdegi saýalǵa tez jaýap alýǵa múmkindik alady. Sondaı-aq arnaıy beketter de salynady. Onyń qurylysy 2019 jyly bastalmaq. 

«Qazirgi tańda ishki ister basqarmasynyń qorshap jatqan qorshaýlary memlekettik búdjetten birde-bir tıyn shyǵarylmaı salynǵan bolatyn. Jetekshilerdiń ózderimen. Óz kúshterimen. Al keler jylǵa osy qorshaýlardy salý úshin memlekettik qazynadan 614 mıllıon teńgege jýyq qarajat bólindi», – dedi Almaty qalalyq İİD resmı ókili Saltanat Ázirbek.

İshki ister departamentiniń Jedel basqarý ortalyǵynda qyzmetkerler sany artady. Qosymsha 4 jumys orny ashylǵan. Qazirgi tańda ortalyqta 10 operator jumys isteıdi. Odan bólek, 13 adam is-tájirıbeden ótip jatyr. Ortalyq qyzmetkerleri qazir 12 saǵattyq jumys kestesi boıynsha qyzmet etýde. Aýysymmen jumys jasaıtyndyqtan bos vakansıa bar deıdi ortalyq basshylary. Jalaqy 40 myń teńgeden bastalady. Qaladaǵy kólik qozǵalysy men qoǵamdyq qaýipsizdikti syrttaı baqylap otyrady. Sondaı-aq túrli jaǵdaıǵa tap bolǵan azamattardyń qońyraýyn qabyldap, jedel áreket etý de osy qyzmetkerlerdiń mindeti.  

«Qazirgi kezde jasap jatqan analızge qaraǵanda, kúnine 12 saǵattyń ishinde kúndizgi kezde 1000-nan astam habarlama túsedi. Túnde de solaı. Ár aptada ár túrli habarlamalar túsedi. Jalpy, eń az degeni myńnan asady. Operatorlardyń bilimi jaǵynan quqyqtyq kodeksterdi bilýi mańyzdy, qalany bilýi kerek. Qalada baǵyt-baǵdar jasaı alýy kerek. Qalany bilmese qıyndaý bolady. Durys baǵdar jasasa, habarlama da tez jetedi», – dedi Almaty qalalyq İİD Jedel basqarý ortalyǵy basshysynyń orynbasary Muhtar Asheev.