Ata Zańymyz qabyldanǵan qasıetti kún, ıaǵnı Konstıtýsıa kúni Almaty qalasynda atalyp ótti. Búgin Respýblıka saraıynda bolǵan saltanatty jıynnyń shymyldyǵyn qala ákimi Baýyrjan Baıbek ashyp berdi. Ol Ata Zańnyń búgingi kún men bolashaq úshin qabyldanǵanyn jáne jyldan jylǵa el azamattarynyń quqyqtyq mádenıetin joǵarylatý jolynda irgeli jumystar atqarylyp kele jatqanyn basa aıtty.

Quqyqtyq, zańdylyq máselelerin ǵalamtor arqyly sheshý de oıdaǵydaı júzege asyrylýda. Ol úshin arnaıy «Elektrondyq úkimet» portaly qurylǵany barshaǵa aıan. Baýyrjan Baıbek Almaty qalasyn turǵyndarǵa barynsha jaıly shahar etý úshin jasalyp jatqan sharalarǵa toqtalyp ótti.  

«Aıta keteıik, bıyl jańa oqý jylyna bólingen granttar sany 17 paıyzǵa ósip, 22 myńdy qurady. Iaǵnı, respýblıka kólemindegi grant sanynyń 30 paıyzy Almaty qalasynyń joǵary oqý oryndaryna berilgen. Qazirgi qoldanylyp júrgen Konstıtýsıa 1995 jyly 30 tamyzda búkilhalyqtyq referendým arqyly qabyldanǵanyn aıta ketý kerek. Oǵan deıin ıaǵnı, Qazaqstan táýelsizdigin alǵannan keıingi 1993 jyldyń 28 qańtarynda óziniń alǵashqy Ata Zańyn qabyldaǵan bolatyn», – dedi Almaty qalasynyń ákimi Baýyrjan Baıbek.

Zańnamaǵa sáıkes, 30 tamyz Konstıtýsıa kúni – demalys kúni ekeni belgili. Bıyl mereke beısenbige túsip turǵandyqtan, Úkimet qaýlysymen, 25 tamyzdaǵy demalys kúni 31 tamyzǵa aýystyryldy. Osylaısha, aptasyna bes kún jumys isteıtin qazaqstandyqtar 30 tamyzdan 2 qyrkúıekke deıin 4 kún demalady.