Atyraýdaǵy ortalyq mýzeıde «Rýhanı jańǵyrý» baǵdarlamasy aıasynda «Bókeı Ordasynyń sońǵy hany Jáńgir hannyń tarıhtaǵy orny» degen ataýmen kórme zaly ashyldy.

Onda XIX ǵasyrdaǵy Orda qazaqtarynyń turmysy men salt-dástúrine qatysty jádigerler, aqsha úlgileri, fotosýretter men túrli qundy qujattar qoıylǵan. Óz zamanynyń belgili tulǵasy bolǵan Jáńgir han Bókeıhanuly týǵan halqynyń turmysyn Eýropa mádenıetine ıkemdeýge baryn saldy. Sol ǵasyrdyń ózinde Ordada dárihanalar men shaǵyn sheberhanalar jumys jasaǵan. Jáne jalpyǵa ortaq, eki tilde oqytatyn mektepter boldy. Osy oqý oryndaryn támamdaǵan qabiletti jastardy han óz qarjysyna Sankt-Peterbýrg, Ýfa, Qazan sekildi Reseıdiń basty qalalaryna jiberip, bilim alýlaryna jaǵdaı jasaǵan. Keıin olardyń arasynan kóptegen bilikti tulǵalar shyqqany tarıhtan belgili.

"XII-XX ǵasyrdaǵy ólke tarıhy zalyndaǵy ekspozısıalyq qurylymnyń jalpy maqsaty sol kezeńniń tarıhı oqıǵalarymen, tarıhı tulǵalarymen tanystyra otyryp, jastardyń osy týǵan jerge qazaq halqynyń tarıhyna degen súıispenshiligin arttyrý", - deıdi mýzeı qyzmetkeri Aqtoty Orynbasarova.