Atyraý oblysynyń ákimi Nurlan Noǵaev pen Mańǵystaý oblysynyń ákimi Eraly Toǵjanov eki oblystyń arasyndaǵy yntymaqtastyq týraly memorandýmǵa qol qoıdy.
Memorandýmnyń maqsaty - óńiraralyq kooperasıany damytý jáne óńirlerdiń básekege qabilettiligin arttyrý bolyp tabylady.Taraptar ónerkásip, shaǵyn jáne orta bıznes salasynda, aýyl sharýashylyǵy, densaýlyq saqtaý, ekologıa, qurylys salalarynda yntymaqtastyq jasaýǵa kelisti. Sondaı-aq oblystar arasynda jastar saıasaty, mádenıet jáne sport salalarynda da ózara is-qımyl jasaý kózdelýde.
Atyraý oblysynyń ákimi Nurlan Noǵaev atap ótkendeı ákimdikterdiń aldynda turǵan basty mindet- óńirlerdi ekonomıkalyq damytýdyń túrli salalaryndaǵy tabysty jumys tájirıbesimen tanysý.
"Memleket basshysy Nursultan Nazarbaevtyń mańyzdy tapsyrmalarynyń biri óńiraralyq qarym-qatynasty damytý bolyp tabylady.Tabysty tájirıbe almasý óte paıdaly, bul kóp jaǵdaıda damý prosesterin jedeldetedi. Biz búgin máselelerdiń keń aýqymyn talqyladyq, ekijaqty yntymaqtastyq aıasynda kóptegen jobalar boıynsha pikir almastyq.Biz qyzyǵýshylyqtyń, máseleni uǵynýdyń bar ekenin kórip otyrmyz. Jaqyn arada barlyq talqylanǵan jobalardy iske asyrý josparlanýda», - dedi Nurlan Noǵaev.
Mańǵystaý oblysynyń ákimi Eraly Toǵjanovtyń pikirinshe, ekonomıkany ártaraptandyrý maqsatynda shıkizattyq emes sektorlardy damytý máselelerine nazar aýdarý qajet.
"Bul óńdeý ónerkásibi, shaǵyn jáne orta bıznesti damytý, aýyl sharýashylyǵyndaǵy jobalardy iske asyrý, azyq-túlik qaýipsizdigi. Qurylys jáne týrızmdi damytý salasynda tartymdy jobalar bar. Barlyq qol jetken kelisimderdi iske asyrý óńirler men respýblıkanyń ekonomıkalyq ósýi úshin serpin bermek", - dep basa aıtty Eraly Toǵjanov.
Búgingi kúni Mańǵystaý oblysy elimizdiń iri kólik logıstıkalyq habtarynyń biri. Teńiz porttaryn damytý Qazaqstannyń ekonomıkasy úshin úlken serpin beredi. Mańǵystaý oblysynyń basshysy iri munaı jobalaryndaǵy qazaqstandyq qamtý máselesin qozǵady.
"Oblystyń aýmaǵynda úsh munaı kompanıasy jylyna orta eseppen 1 trln 400 mlrd teńgege taýarlar satyp alady. Onyń ishinde 30%-y respýblıkadan tys jerlerden, bul shamamen 500 mlrd teńge. Bul bizdiń kásiporyndar úshin, ınvestısıalar tartý úshin úlken naryq jáne áleýet. Osy taýarlardy respýblıka aýmaǵynda óndire otyryp, biz jergilikti kompanıalardy damytýǵa, jańa jumys oryndaryn ashýǵa, memleket búdjetin tolyqtyrýǵa jaǵdaılar jasaımyz", - dedi Eraly Toǵjanov.
Óz kezeginde Atyraý oblysynyń ákimi Nurlan Noǵaev oblys aýmaǵynda arnaıy ındýstrıalyq aımaqty damytý boıynsha bolashaq josparlar týraly áńgimeledi.
«Ózderińiz bilesizder, Parlamentte arnaıy ekonomıkalyq jáne ındýstrıalyq aımaqtar týraly zań jobasy talqylanýda. Eger bul zań qabyldanatyn bolsa biz osy baǵytta damytýǵa daıynbyz. Isataı aýdanynda arnaıy ındýstrıalyq aımaq qurý úshin jer ýchaskesi bólindi. Osy baǵytta tájirıbe almasý úshin biz Túrkıada boldyq. Olarda ındýstrıalyq aımaqtyń aýmaǵynda 35 myń adam, shamamen 180 rezıdent jumys jasaıdy. Olardyń bir bóligi, 35-40 kásiporyn bizdiń naryqqa kelýge daıyn.Bul úshin zańnamalyq baza, salyq turaqtylyǵy qajet. Sonymen birge bizde munaıhımıalyq klasterdi damytý úshin arnaıy ekonomıkalyq aımaq jumys jasaıdy. Mundaı jobalardy iske asyrý daıyn ónim shyǵarýǵa múmkindik beredi, bul básekege qabiletti kásiporyndar qurýǵa septigin tıgizedi», - dep túsinik berdi Nurlan Noǵaev.
Aıta ketelik, memorandýmǵa qol qoıý eki oblystyń ekonomıkalyq jáne ınvestısıalyq áleýetin damytýǵa jańa serpin beredi.
