Almaty oblysynda kúzgi merzimdi áskerge shaqyrý naýqany bastaldy. Bul kezeńde Jetisý óńirinen 1991-2000 jyly týylǵan 1900-ge jýyq azamat ásker qataryna attandyrylady dep josparlanǵan.
Osyǵan oraı, Almaty oblysy Qorǵanys isteri jónindegi deparatmentiniń uıymdastyrýymen nusqaýlyq-ádistemelik jıyn ótkizildi. Atalǵan sharaǵa shaqyrý, medısına komısıasynyń tóraǵalary, jergilikti áskerı basqarý organdarynyń bastyqtary, Taldyqorǵan garnızonynyń áskerı prokýrory, UQKD, İİD jáne áskerı bólimderdiń ókilderi qatysty.
Jıynnyń basty taqyryby – kóktemgi merzimdi áskerge shaqyrýdy qorytyndylaý, kúzgi áskerge shaqyrýdyń negizgi mindetteri men talaptaryn talqylaý. Ár qurylymdyq bólimderdiń ókilderi óz salasyna qatysty taqyrypta baıandama jasap, merzimdi áskerge shaqyrýda oryn alatyn máseleler men olardy sheshý joldarymen bólisti.
Sonymen qatar, Qorǵanys isteri jónindegi biriktirilgen basqarmasy men bólim bastyqtary merzimdi ásker qataryna shaqyrýǵa daıarlyqtary, júrgizilgen jumystary men josparlary boıynsha tyńdalady.
Óz kezeginde Almaty oblysy Qorǵanys isteri jónindegi deparatmentiniń bastyǵy podpolkovnık Talǵat Dáýlethanov áskerge shaqyrý jumysymen aınalysatyn jaýapty adamdardyń qyzmetterine jaýapkershilikpen qaraýǵa shaqyrdy.
* Otan aldyndaǵy boryshyn óteýdi qasıetti paryzym dep biletin, moraldyq jáne psıhologıalyq turǵydan myqty, fızıkalyq jaǵynan myǵym azamattarǵa basymdyq bergenimiz jón, - dedi ol.
Ústimizdegi jyldyń 10 qyrkúıeginen bastap Almaty oblysynan shaqyrylǵan azamattar QR UQK Shekara qyzmetiniń áskerı bólimderine attandyryla bastaıdy. Odan keıingi kezekte QR Memlekettik kúzet qyzmeti, QR Qarýly Kúshteri, QR İİM Ulttyq Ulannyń áskerı bólimderine jiberiledi.
Kúzgi áskerge shaqyrý naýqanyn sapaly, ári ýaqtyly oryndaý maqsatynda komısıa ár shaqyrylýshyny jeke-jeke qarastyryp, alǵan bilimin, mamandyǵyn eskeredi, otbasy jaǵdaıyn saraptaıdy, densaýlyǵynyń jaramdylyǵyn basty nazarǵa ala otyryp, ony ásker qataryna qabyldaý-qabyldamaý týraly sheshim qabyldaıdy. Jasaqtaý eksterrıtorıaldy prınsıpke sáıkes júzege asyrylady, ıaǵnı shaqyrylýshy ózge oblysqa attandyrylady.
Merzimdi áskerı qyzmetke shaqyrý 2018 j. jeltoqsan aıynyń sońyna deıin júrgiziledi. «Áskerı qyzmet jáne áskerı qyzmetshilerdiń mártebesi týraly» QR Zańyna sáıkes merzimdi áskerı qyzmetke 18 ben 27 jas aralyǵyndaǵy, merzimin keıinge qaldyrýǵa jáne áskerden bosatylýǵa quqy joq azamattar qabyldanady.
