Aqtóbe qalasyndaǵy jataqhanalardyń jaı-kúıin tekserý maqsatynda qurylǵan arnaıy top ókilderi M.Ospanov atyndaǵy Batys Qazaqstan memlekettik medısına ýnıversıtetiniń jataqhanalaryna reıd jumystaryn júrgizdi.
Oblystyq jastar saıasaty máseleleri basqarmasynyń uıymdastyrýymen ótken sharaǵa Aqtóbe qalalyq jergilikti polısıa qyzmetiniń bastyǵy Baqytbek Sydyqbaev, qalalyq máslıhat depýtattary, koǵamdyq keńes jáne «Jas saqshy» jasaǵynyń músheleri qatysty.
Atalǵan ýnıversıtette barlyǵy 5 stýdentter jataqhanasy bar. Aldymen top ókilderi A.Dosjanova atyndaǵy №5 jataqhanada boldy.
— Qazir stýdent úshin jataqhanadan oryn alý — eń basty máselelerdiń biri. Bul jataqhanada myń stýdentke arnalǵan oryn bar. Bir stýdent bir bólmede turatyn bolsa, jataqhana aqysy — 10 aıǵa 120 myń teńge. Al eki nemese úsh adamǵa arnalǵan bólmeler — 80 myń teńge turady. Aldymen ózge oblystan kelgen stýdentter ornalastyrylady. Jalpy, bıyl barlyq stýdentterge oryn jetkilikti. Aqtóbede qoǵamdyq tártipti kúsheıtý maqsatynda ótken aıda «Jas saqshy» jasaǵy qurylǵan bolatyn. Jastar men stýdentterden quralǵan top ókilderi kúndizgi jáne túngi reıdterge shyǵyp, jastar arsyndaǵy qoǵamdyq tártipti, qala tazalaǵyn, jastardyń qoǵamdyq ortada ózin-ózi ustaýyn qadaǵalaıdy, — deıdi «Jas saqshy» jasaǵynyń kóshbasshysy Aıagúl Janǵoja.
Búginde jataqhanaǵa stýdentterdiń alǵashqy legi ornalasyp jatyr. Jastar ıgiligine berilgen jańa jataqhanada barlyq jaǵdaı jasalǵan. Medısınalyq pýnkt, kompúterlik zaldar, ár qabatta demalys oryndary men asúı bólmeleri, t.b. bar. Tórt blokqa bólingen jataqhanada tórt kýrstyń stýdentteri turady. Jetim jáne kóp balalaly otbasynan shyqqan stýdentterge jataqhanada tegin turýǵa múmkindikter qarastyrylǵan.
Budan soń arnaıy top ókilderi medısına ýnıversıtetiniń №1 jataqhanasyna bardy. Jataqhananyń komendanty Sálıma Jańabaevanyń aıtýynsha, munda
430 stýdentke arnalǵan oryn bar. Onyń 300-ge jýyǵy sheteldik azamattarǵa arnalǵan. Stýdentter«Sırıýs» avtomattandyrylǵan aqparattyq júıesi arqyly onlaın suranys beredi. Iaǵnı barlyǵy elektrondy túrde júrgiziledi. Jataqhana aqysy — 10 aıǵa 50 myń teńge.
