Aqtóbe oblysynyń ákimi Berdibek Saparbaevtyń bastamasymen oblysta «Týǵan jerge taǵzym» aksıasy aıasynda aýyl-aımaqtarda jańa ǵımarattar boı kóterýde. Ásirese, Aqtóbe oblysynyń Qarǵaly, Temir, Qobda aýdandarynda qarqyndy jumystar júzege asyrylýda.
Bıyl Qarǵaly aýdany boıynsha atalǵan aksıa aıasynda josparlanǵan jobalardyń sany – 46, jalpy quny — 101 mln 103 myń teńge. Búgingi kúni aýdan boıynsha «Týǵan jerge taǵzym» aksıasy aıasynda 28 joba jáne aýyldyq mektepterde 50-den asa kishi joba júzege asyrylǵan. Jalpy quny — 54 mln 750 myń teńge. Aksıa aıasynda barlyq 8 aýyldyq okrýg qamtylǵan.
Aýdandyq ishki saıasat bóliminiń basshysy Erjan Esimbaevtyń aıtýynsha, bıyl qyrkúıek aıynda aýdanda jerlester forýmyn ótkizý josparlanýda. Forýmǵa aýdannan shyqqan qurmetti azamattar, belgili kásipkerler, ár salanyń bilikti ókilderi, t.b. shaqyrylady.
Atalǵan forým aıasynda Reseı, Germanıa jáne basqa da memleketterden keletin jerles kásipkerlerdiń jáne túlekterdiń qatysýymen aýdan aýmaǵynda áleýmettik nysandardy salý úshin birneshe memorandýmǵa qol qoıylmaq. Aksıa aıasynda aýdan ortalyǵy Badamsha aýylynda mektep túlekteriniń demeýshiligimen jastarǵa arnalǵan hokeı korty salyndy. Sondaı-aq «Baqytty bala» jobasy aıasynda №1 Badamsha orta mektebiniń janyndaǵy jazǵy sport alańyna jeke kásipkerdiń demeýshiligimen qurylysqa deıingi barlyq jumystar júrgizilgen.
«Týǵan jerge taǵzym» aksıasy aıasynda oblystyń Jeltaý aýyldyq okrýgine qarasty Sh.Qaldaıaqov aýylynda kásipker B.Saımaqovtyń demeýshiligimen «Qazposhta» mekemesi ǵımaratynyń qurylysy aıaqtalyp, paıdalanýǵa berildi. Qosestek aýylynda jeke kásipkerlerdiń demeýshiligimen aýylishilik 4 kóshege aǵymdaǵy jóndeý jumystary júrgizildi. Kempirsaı aýyldyq okrýgine qarasty Josaly aýylynda jospardan tys aýylishilik kóshelerge aǵymdaǵy jóndeý jumystary jasalyp, aýyl turǵyndarynyń jáne jeke kásipkerlerdiń demeýshiligimen 8 kóshege qıyrshyq tas tóselip, tegisteldi.
Búgingi kúni jospardan tys barlyq okrýgterde aýyl turǵyndaryna arnalǵan vorkaýt alańdary salynýda. Qazirgi tańda atalǵan alańdar Badamsha, Qosestek, Ashshylysaı, Álimbet aýyldarynda turǵyndarǵa paıdalanýǵa berilgen.
-Bıyl maýsym aıynda barlyq mektep túlekteriniń basyn qosqan «Túlekter festıvalinde» aýdan ortalyǵynyń stadıonynda ár jyldarda túlep ushqan túlekterdiń qatysýymen saltanatty shara ótti. Atalǵan shara aıasynda jerlesterdiń qatysýymen Badamsha, Ashshylysaı, Stepnoı aýyldyq okrýgterinde kezdesýler, dóńgelek ústelder, sheberlik klastary uıymdastyryldy, — deıdi E.Esimbaev.
Aıta ketý kerek, bıyl jospardan tys jeke kásipkerdiń demeýshiligimen jalpy quny 25 mıllıon teńge kóleminde Petropavl aýylynda jetim ósken balalardyń otbasyna arnalǵan turǵyn úı paıdalanýǵa berilmek.
