"Halyq Banktegi" bedireıgen menedjerden saqta, kekireıgen bólim bastyǵynan saqta, qozǵalmaıtyn kezekten saqta, kartańdy qaǵar esepten saqta!"

Búgingi zamannyń batasy osyndaı. Sol zamandy jasap otyrǵan adamy da sondaı.

Ata-babamyzdan qalǵan el kógerter batalar qandaı edi. Bir sholyp shyǵaıyqshy.

«Dalaqtatar daýdan saqtasyn,

Jalaqtaǵan jaýdan saqtasyn,

Ashyqqan bóriden saqtasyn,

Ashynǵan urydan saqtasyn!»

Urpaǵyn bar jamandyqtan saqtaýdy nıet etken kez kelgen ortada qaýymnyń alaqanyn jaıdyrtyp qoıyp, kónekóz qarıa batasyn aıtqanda bar yntańmen «Áýmın!» desetin batalardy joǵarydaǵydaı «batalarmen» almastyryp jatqanymyz kóńil qynjyltady.  

Já, kóp sozbalaqtamaı, birden iske kósheıin. "Halyq bank" pen qarabaıyr halyq týraly jyryma kezek bereıin. 

Babamyz saqtaǵysy kelgen sol daý da, jaý da, bóri de, ury da halyq arasynda, tipti sol halyqqa «qyzmet jasap júr». Halyqtyń atyn jamylǵan «Halyq bank». Atam aıqan daý búgingi kúni tutynýshylar men Halyq bank qyzmetkerleri arasynda týyndap jatyr. Áýeli ol bank halyqtyń jaýyna aınalyp úlgergen. Halyqtyń aqshasyn «jymqyryp» jep jatqan bóri de sol bank, kartochkalardan aqshany bildirmeı ózine aýdaryp jatqan ury da sol bank. Halyqty ashyqtan-ashyq tonap jatqan nesıeniń jyry taýsylmaı turǵanda nesıesiz-aq tonap jatqan da sol bank.

Búginde "Halyq bankke" jarysa aryzdanyp jatqan halyqtyń qarasy basym. Biri ondaǵy kezekti aıtyp qaraıady, biri «qyzmet úshin» dep bank qaǵyp alatyn aqshasyn aıtady, munymen taýsylmaıdy. 18 mıllıon halyqtyń teń jartysy osy bank arqyly aılyq alady, tólemder men aýdarymdar jasaıdy. Sebebi «halyq úshin» qyzmet etýi tıis bankpen uıymdardyń basym kóbi kelisimge otyrǵan. Áleýmettik jelidegi halyqtyń muńyn kózimiz shalǵan biz sol muńnyń 5 paıyzyn bolsa da saıtymyzǵa shyǵaryp qoıýdy jón kórdik. Jelige qansha kósilip jazǵanyńmen «Keshirim suraımyz, olqylyqty retteýge kúshimizdi salyp jatyrmyz» degen jaýappen qutylatyn "Halyq bank" keńesshileri iske shynaıy kirisse eken degen talap-tilegimiz...

Halyqtyń ýaqytyn urlaǵan bank

El dattaǵan bankti jýyq arada belgili zańger Abzal Quspan da sóz etti.  

«El maqtaǵan, «toıyst» dattaǵan "Halyq bankine" kúnimiz túskesin biz de keldik. Dattaý emes, boqtaý kerek qoı mundaı bankti?! Bank qyzmetkerleri sheneýnikterden beter tákappar, tutynýshylar quqyǵy degen túsinik áý basta bolmaǵan ba dep qaldym bul uıymda. Muny aınalamdaǵy adamdardyń, ıaǵnı bank klıentteriniń aıqaıy men bank qyzmetkerleriniń reaksıasyna oraı aıtyp otyrmyn. Áıtpese, maǵan eki dúnıe bir, offlaında kóp kútýge týra kelse, onlaınǵa kete salamyn», - dep ashynyp jazdy kezekte ýaqytyn qur ótkizip alǵan halyqtyń qamyn dep júrgen azamat. Zańgerdiń jazǵanyna bank keńesshisiniń jaýaby tómendegideı:

Kelesi bir aryzdanýshylardyń aıtqanyna nazar salsaq...

«Ótkende isim túsip, kórmesteı bolyp ketip edim. Birinshi barǵanymda eki saǵat kútip, jumysymdy bitire almaı qaıttym úıge. Araǵa eki-úsh kún salyp taǵy baryp, báleń saǵat tosyp, áreń aıaqtadyq. Onda da eki jerdegi fılıalynan da talon alyp, buryn keler kezekke júgirip júrdik. Qyzmetkerlerdiń jaıbasarlyǵy men júıesiz jumysy qańyńdy qaraıtady. Saǵattap kezek kútken halyqtyń ókpe-renishin sózben aıtyp jetkizý qıyn. Halyq keńesshisi, jaltarma jaýappen jurtty aldap sharshamadyńyzdar ma?! Basshylyqtaryńyzǵa jetkizseńizdershi. Shara qoldansyn. Áıtpese, azyn-aýlaq abyroıdan da jurdaı boldyńyzdar-aý. Komısıalap halyqtyń aqshasyn jep ap, endi ýaqytyn urlaýǵa kóshtińizder me? Óı, atyńnan sadaǵa ketkir!» - dep ashýlandy jas aqyn Sherhan Talap.

"Halyq banktegi" kezektiń kesirinen 4 kún jumysynan qalǵan Órken Qýandyq ta ol bankke endigi attap baspaspyn dep kúıinip otyr.

«4-5 saǵatyń ketedi. Talon alasyń da, kóziń baqyraıyp kezegińdi kútesiń. Sóıtip otyrǵanda keshki 19:00 bolady. Shydamyń taýsylǵandyqtan qaıtasyń. «Sıfrlyq Qazaqstan» dep qoıady. Jaı aqsha aýdarýdyń ózi muń. Mobıldi nusqasy durys istemeı qalatyn jaǵdaılar kóp bolady. Al, jaraıdy aýdardyń delik. Biraq qyzmet úshin dep 200 teńgege jýyq aqshańdy jymqyryp alady».

Mundaǵy kezekti bank qyzmetkerleri «Qazkom-men" birigýdemiz» dep aqtalady. Bıyl shildede eki bank tolyǵymen birigip bitti. Durysy, "Halyq bank" "Qazkom-dy "ózine qosyp alý prosesin aıaqtady. «Bári halyq úshin» dedi. Alaıda qınalyp jatqan taǵy sol qarapaıym halyq.

Halyqtyń aqshasyn urlaǵan bank

Mine, bul "Halyq bankten" kelgen habarlama. Nege ekeni belgisiz 10 kúnde 500 teńgeni qaǵyp aldy. Tipti qandaı qyzmet úshin alynǵany jazylmaǵan.

Suraǵanymyzda «Shottan aqsha sebepsiz ustalynbaıdy» dep jaýap qatypty. Al qandaı sebep? Ashyp aıtyńyzdarshy?

Almaty turǵyny Nurbolat Álmenov ár qımyly úshin aqsha alatyn bankten aqyry bas tartyp, kartochkasyn ekige bólip, esigin tars jaýyp ketken eken.

«Halekeń» jyl basynda 800 teńge «za obslýjıvanıe» dep sypyryp alady. Siz jumys isteıtin mekemeden jalaqy jibergende aı saıyn komısıa alady. Birlik teksergenińiz úshin ustaıdy, sms úshin taǵy. Basqa bankomattan alǵanyń úshin taǵy. Kartochkaǵa termınal arqyly aqsha salsań, 50 teńge, al sol aqshany alǵan adam somanyń 1%-yn amalsyz «sadaqa» etedi. Osyndaı halyqty «oılaıtyn» bank bar ma basqa elde? Áı, joq shyǵar!» dep ashýǵa býlyqty.

Munymen bitse ıgi. Tipti birneshe aı paıdalanbaǵan kartochkanyń ózin qaryzǵa kirgizip jiberetini taǵy bar.

«Meniń bir jylǵa jýyq paıdalanbaǵan kartochkam "-10000" dep qaryzdy kórsetip tur, ne úshin?! Ony kórip tań qaldym, birde bir sms kelmegen!» dep kúıindi Altynaı Qaısa atty bank tutynýshysy.

Halyqtyń júıkesin urlaǵan bank

Almatynyń qaınaǵan tirshiliginde onsyz da júıkesi syr berip júrgen halyq «Halyq bankti» jaýyndaı kórip ketken. Almaty qalasy Ál-Farabı men Seıfýllın kósheleriniń qıylysyndaǵy úlken ǵımarat "Halyq banktiki".

Bank aı saıyn qorytyndy esep berýler ótkizip álek. «Bári jaqsy, nesıeniń paıyzyn azaıttyq, tutynýshylardyń sany artyp keledi, másele joq» dep jar salyp jatqany bolmasa, halyqtyń muńyna qulaq asaıyn degen bankti kórmeısiń. Qashan da «Bul olqylyqty retteımiz» degen jaýaby daıyn turatyn bank shara qoldanbasa, halyq bolyp bankten bas tartýymyz ǵajap emes.