Almatyda jedel járdem kóliginiń júrgizýshisine judyryq ala júgirgen Túrkıa azamaty týraly jańa derekter paıda boldy. 28 jastaǵy Alı Demır temir tulpardy 4 aı buryn satyp alǵan. Osy ýaqytta birneshe ret jol erejesin óreskel buzyp úlgergen. Al búgin áriptesine temir tulpar satqan otbasy kóliktiń aqshasyn alǵanymen, qujattary jóndi jasalmaǵanyn aıtady. Sondyqtan «jelige áldekimder biz týraly jalǵan aqparat taratty» dep otyr. Bul týraly Almaty arnasy habarlaıdy.

Ozkylychtar otbasynda keshegi jaǵa ustatarlyq oqıǵadan keıin maza joq. Aıtýlarynsha, áleýmettik jelige áldekimder kóliktiń ıesi týraly bar aqparatty júktep jibergen. Onda Aıgúl Ozkylych týraly bar málimet kórsetilipti. Al sodan keıin otbasyǵa birneshe adam habarlasyp, ses kórsetken kórinedi. Buǵan shydamaǵan olar búgin bar shyndyqty jaıyp saldy. Aıtýlarynsha, Alı Demır otaǵasynyń bıznestegi áriptesi eken. Kólikti satyp alǵanymen, Qazaqstan azamattyǵy joq jigit qujatty 4 aıdan beri rásimdeı almaı júrgen.

«Ana kisi menen mashınany surady. Men sattym. Tolyq aqshasyn tóledi. Mashınany tirkeýden shyǵaryp beremiz degen. Biraq kólik tirkeýden shyǵarylmaı qalǵanda, áıeli ekiqabat bolǵan, aýyryp aýrýhanaǵa tústi. Áıeli bosanǵannan keıin de kólikti tirkeýden shyǵaryp áıeliniń atyna bere almadyq. Jaı ǵana senimhatpen, saqtandyrý kýáliginde aty-jónin jazdyryp, kólikti bere saldyq», – dedi Erkan OZKYLYCH.

Úsh balasy bar otbasy jeke derekti jelige taratqandardy jaýapqa tartqyzbaq. Tipti, aryz da jazyp qoıǵan. Olar temir tulpardy Alı Demırge satqaly beri keleńsizdik kóp bolyp jatqanyn aıtady. Sózderinshe, judyryq ala júgirgen jigit jıi jol erejesin buzady eken. Shilde aıynda shamamen, 7 ret aıyppul alypty. Onyń qatarynda jyldamdyqty shamadan tys asyryp, baǵdarshamnyń qyzyl túsine ótkeni úshin aıyppul da kelgen.

«Jaman jaǵdaıda qaldym. Uıat is boldy. Ol 60-tan asqan úlken kisi, óziniń ákesimen jasty. Ondaıǵa baratyn jigit dep oılaǵan joqpyz. On saýsaq bári birdeı emes qoı. Ondaıdy biz de kútken joqpyz. Ol kólikke ıe bolǵaly beri, jol erejesin buzǵany týraly 6-7 ret aıyppul túbirtegi keldi. Demek, rasymen de, jol erejesin buzyp júrgen boldy ǵoı», – deıdi Aıgúl OZKYLYCH.

Al zańger Asqar Qaımaqov jedel járdem brıgadasyna ózderin qorǵaıtyn qural-jabdyqtar berilse degen usynys aıtty. Sondaı-aq, jumysqa fızıkalyq turǵydan daıyndyǵy bar qyzmetkerler alynsa deıdi.

«Bul búgin ǵana týyndap otyrǵan másele emes. Brıgada naýqasqa shyqqanda jolda túrli kedergiler týyndatatyn jaǵdaılar bolady. Ózderi dáriger shaqyryp alyp, tıisetinder de bar. Sol úshin ekıpajǵa qorǵanyp júrýge arnalǵan elektrondy qarý, gaz balonyn alýǵa zańdy túrde ruqsat etý kerek. Bizde jedel járdem kóligine jol berý mádenıetin qalyptasyrý qajet», – dedi zańger Asqar QAIMAQOV.

Eske sala keteıik, keshe dabyl belgisin qosyp, naýqas ákele jatqan jedel járdem kóliginiń júrgizýshisi soqqyǵa jyǵylǵan bolatyn. Jeńil kólikti taqymdaǵan júrgizýshi jol boıy 2 ret jedel járdemniń aldyn kes-kestep, jol bermegen. Onysymen qoımaı ashýǵa minip, jedel járdemniń júrgizýshisine joldyń qaq ortasynda judyryq ala jónelgen. Jelige taraǵan vıdeoda jas jigittiń Nıkolaı Kýchmanyń jaǵasyna jarmasyp, kólikten túsirip alǵany anyq kórinip tur. Soqqydan jedel járdem júrgizýshisiniń qabaǵy jarylyp, birneshe jerinen jaraqat alǵan edi.