Búgin Aqtóbede respýblıkalyq Analar sleti aıasynda respýblıkadaǵy tuńǵysh «Anaǵa taǵzym» rýhanı-adamgershilik tárbıe berý ortalyǵy ashyldy.

Saltanatty sharaǵa KSRO halyq ártisi B,Tólegengova, Sosıalısik eńbek eri V.Sıdorova, balalar quqyqtary jónindegi ýákil S.Aıtbaeva, QR UǴA akademıgi, Raısa Kúzdenbaeva, etnograf Zeınep Ahmetova, belgili aqyn ári jýrnalıs Marfýǵa Aıqojına, QR Eńbek sińirgen qaıratkeri A.Jaǵanova qatysty.

Biregeı joba «Týǵan jerge taǵzym» aksıasy aıasynda demeýshiler men oblys turǵyndarynyń qarajaty esebinen júzege asyrylǵan. Ananyń aq jaýlyǵy ispetti turǵyzylǵan ortalyqtyń quny 350 mln teńge.

«Atalmysh keshenniń ashylýy – bul esimi árqaısysymyz úshin qasıetti ári baǵa jetpes bolyp tabylatyn, qazaq halqynyń analaryna, qyzdaryna degen taǵzym. Budan bylaı kóp balaly analarǵa «Altyn alqany», «Kúmis alqany» osynda tabys etetin bolamyz. Óńirdiń damýy men otbasylyq qundylyqtardy nyǵaıtýǵa aıtarlyqtaı úles qosqan aqtóbelik analar úshin «Ana dańqy» tósbelgisin daıyndap jatqanymyzdy aıtqym keledi. Ony ómiri ózgeler úshin úlgi bolarlyq naǵyz laıyqty jandar alatyn bolady. «Anaǵa taǵzym» kesheni rasymen de rýhanı ortalyqqa aınalyp, óskeleń urpaqty tárbıeleýde úlken ról atqaratynyna senimdimin», - dep atap ótti oblys ákimi Berdibek Saparbaev ortalyqtyń ashylý saltanatynda.

Aıta keteıik, ortalyq qyzmeti qazaq halqynyń salt-dástúrin eskere otyra áıeldiń otbasyndaǵy rólin kúsheıtýge, bolashaq analardy tárbıeleýge baǵyttalatyn bolady. Munda óskeleń urpaqqa bilim-tárbıe berý jumystary júrgizilip, jastarǵa qazirgi qoǵamda qajet qundy baǵdarlardy damytýǵa múmkindik beretin psıholgıalyq jeńildeý jáne keńes berý, qoldanbaly óner, jalpy damý, mýzykalyq tárbıe berý, stılısıka jáne dızaın, otbasylyq trenıń pen basqa da qyzmet túrlerin kórsetetin kabınetter jumys jasaıtyn bolady.

«Ortalyqtyń qurylysyna Aqtóbe oblysynyń kóp turǵyny qatysty. 200-den astam adam jeke shottarynan óz aqshalaryn aýdardy. Ol 2 myń, 50 myń, mıllıon teńge boldy. Sondaı-aq, 300-den asa kásiporyn qarajat bóldi. Bárinen buryn Muǵaljar men shalqar aýdandaryna alǵys aıtqym keledi. Atalmysh aýdandardyń óndiris ujymdary bir kúndik eńbekaqylaryn aýdardy», - dep málimdedi qala ákiminiń orynbasary Kúlparshyn Aıdarhanova.

Ekskýrsıa kezinde qonaqtar ulttyq murajaıdy, ekspozısıalyq zaldy qarap shyqty. Munda kelýshiler elimizdiń tarıhynda mańyzdy iz qaldyryp ketken qazaq halqynyń áıgili tulǵalarynyń ómirimen jáne erlikterimen tanysa alady. Osy jerde Slet delegattary oblystyq murajaıdyń «Aqtóbe ólkesiniń jaýharlary» atty kórmesin, psıhologıalyq jeńildeý jáne keńes berý, qoldanbaly óner, jalpy damý, mýzykalyq tárbıe berý, stılısıka men dızaın jáne t.b. kabınetterdi kórdi. Shara aıaqtalǵan soń bolashaq Analar aleıasynda alǵashqy shyrshalar otyrǵyzyldy.

Eske salaıyq, Aqtóbede «Rýhanı jańǵyrý» baǵdaralamasy aıasynda áıeldiń qoǵamdaǵy róli men mártebesin kóterý, memlekettik organdar men qoǵam nazaryn qazirgi otbasylardyń, ana men bala problemalaryna aýdarý, demografıalyq saıasatty damytý maqsatynda Analar sleti ótip jatyr.

Forýmǵa elimizdiń barlyq óńirinen kelgen qoǵam, memlekettik organdar, úkimettik emes uıymdar, bıznes qurylymdardyń ókilderi qatysýda.