2014 jyly olar qushaqtasyp, fotoǵa túsedi. Ol kezde daǵystandyq Habıb Nýrmagomedov Konor Makgregordyń tóbelesine tánti bolyp júrgen kezi. 2016 jyl – Habıbtyń ákesi Abdýlmanap Nýrmagomedovtyń balasynyń ataq-abyroıyn oılap, aty shýly Konormen jekpe-jek uıymdastyrýdy kózdegen ýaqyty. Alaıda jaraqatqa baılanysty eki sportshy bir-birimen kezdese almaıdy. Habıbtyń Konorǵa qaraǵanda salmaǵy aýyrlaý bolýy da kezdesýdi múmkin qyla almady. Odan keıin Konor 1 jyldyq demalysqa shyǵady. Bul týraly Habıb bylaı ázildegen bolatyn: «Konordyń áıeli emes, ózi júkti bolyp qalǵan sıaqty. Qysqasy, Konor dekrette». Habıbtyń bul ázili Konordyń shamyna tıse bolýy kerek, qarsylasynyń ákesi týraly jazba jarıalaıdy. Konordyń aıtýynsha, Habıbtyń ákesi Ramzan Qadyrovtyń kómekshisi. Kómekshisi degende, quly. Kadyrovtyń arqasynan pyshaq salýǵa árkez daıar turatyn Abdýlmanap Nýrmagomedov shyn máninde Kadyrovqa jaǵympazdanyp, jaǵynyp júrgen qorqaq.  Konordyń bul jazbasy da ǵalamtorda úlken shý týǵyzady. Artynan Kornor Habıb otyrǵan avtobýsqa shabýyl jasaıdy. Muny ózi tańdy tańǵa atyryp aıtyp berýge bolatyn uzaq hıkaıa. Ózderińiz biletindeı, Habıb Konordan qaraǵanda salmaqtylaý. «Avtobýstan tús» dep aıǵaılaǵan Konordy Habıb ıgnor jasaıdy. Biraq daǵystandyqty baısaldy azamat deýge aýzymyz barmas. «Daǵystanǵa kelip án salmańdar» dep reseılik ánshilerge eskertý jasap, qorqytpaqshy bolǵan Habıbtyń ákesi de oraıy týǵanda aıtyp qalǵandy jaqsy kóretin adam sıaqty.

Makgregor men Nýrmagomedov arasyndaǵy bir-birine degen jek kórinish sezimi osylaı bastaý alǵan bolatyn. Munyń barlyǵy jekpe-jekke degen jurttyń qyzyǵýshylyǵyn oıatý úshin jasalynyp jatqan dúnıe me, joq pa, onysyn naqty bilmedik. Biraq kamera aldynda bir-birin julyp jeýge daıyn sportshylardyń kópten kutken jekpe-jegi qazannyń 6-sy kúni Las-Vegas qalasynda ótpek. Keshe ǵana arnaıy pres-konferensıa da uıymdastyrylǵan bolatyn. Qyzý qandy Makgregor konferensıany shoýǵa aınaldyrýǵa tyrysyp baqty. Qolynan keldi de. «Konferensıada jankúıerlerdiń qarasy nege kórinbeıdi»,- dep shaǵymdanǵan Makgregor daǵystandyq jigitke spırttik ishimdik, anyǵyn aıtqanda, ırlandıalyq vıskı usyndy. Otyrǵan ornynan turmaı qoıǵan Habıb ishimdikten bas tartyp, ózin senimdi ustady. Búkil Daǵystannyń ar-namysyn qorǵaıtyn Habıb ataqty Konor Makgregordy tize búktire ala ma, ony tek jekpe-jek aıaqtalǵan kezde ǵana bile alamyz. Ázirge eki sportshynyń jankúıerleri birin-biri synap-minep, ǵaıbattap, ǵasyr jekpe-jegin taǵatsyzdanyp asyǵa kútýde.