Búgin Ortalyq komýnıkasıalar ortalyǵynda «Qazaqstan» RTRK AQ tapsyrysy boıynsha túsirilgen «Kóshpendiler»  atty derekti fılmge qatysty brıfıń ótti.

Sharaǵa Basqarma tóraǵasy Erlan Qarın,  «Bilim - Inovasıa» halyqaralyq qoǵamdyq qorynyń prezıdenti Darhan Óte Ermahanuly, Mońǵolıada turatyn álemge tanymal qazaqtyń búrkitshi qyzy Aısholpan Nurǵaıypqyzy men anasy Almagúl Kóksegen qatysty.

Jobanyń maqsaty – ár elde turatyn qazaqtardyń ómiri men turmys-tirshilikterindegi erekshelikterimen tanystyryp, ultymyzdyń salt-dástúrin dáripteý.

«Kóshpendiler» derekti fılminiń negizgi maqsaty kezinde shetelge qonys aýdaryp, sol jaqtarda turaqtap qalǵan qandastarymyzdyń ómiri men turmys-saltyn kópshilikke kórsetý. Derekti fılmder toptamasy 12 bólimnen turady. Osy jobany júzege asyrǵan otandasymyz, belgili rejıser  Qanat Beısekeev. Fılm Mońǵolıa, Aýǵanystan, Qytaı, Túrkıa, Iran jáne t.b elderdi meken etken qazaqtardyń taǵdyry jaıly baıandaıdy. Iaǵnı, ár elde turatyn qazaqtardyń turmys-tirshiligi, erekshelikteri kórsetiledi. «Kóshpendiler»  derekti fılmder toptamasy Ulttyq arnadan 14 qazannan bastap 23 jeltoqsanǵa deıin efırge shyǵatyn bolady. Sol fılmderdiń alǵashqysynyń keıipkeri ortamyzda otyrǵan Mońǵolıada turatyn qazaqtyń búrkitshi qyzy Aısholpan Nurǵaıypqyzy Qazaqstanǵa birinshi ret kelip otyr»,-dedi Erlan Qarın.

Fılmniń keıipkerleri kadrdan tys mátinsiz, bastarynan ótkergen oqıǵalaryn, ata-babalarynyń tarıhyn baıandaıtyn bolady. Alǵashqy fılmde Mońǵolıada turatyn baýyrlarymyz atadan balaǵa mura bolyp kele jatqan salt-dástúrlerdi sóz etedi.           Atamekennen jyraqta júrgen qandastarymyzdyń shynaıy ómiri kez kelgen kórermenniń qyzyǵýshylyǵyn oıatary sózsiz.

Aıta keteıik, 2016 jyly Mońǵolıada turatyn qazaq qyzy Aısholpan Nurǵaıypqyzy týraly «Búrkitshi qyz» (The Eagle Huntress) atty rejıser Otto Belldiń derekti fılmi shyqqan bolatyn. Alǵash ret 2014 jyly  aǵylshynnyń Daily Mail basylymy «Qazaqtyń salt-dástúrindegi asyl qundylyqtardyń biri - qusbegilik ónerin ıgergen on úsh jasar jalǵyz qyz» atty  Aısholpan jaıly maqala jarıalap, ony búkil álemge tanymal etti.