«Baikonyr Short Film Festival» bıyl da jalǵasyn taýyp, úsh kúnge jalǵasqan qysqametrli fılmder festıvaliniń jeńimpazdary anyqtaldy. Derekti, anımasıalyq jáne kórkem fılm seksıasy boıynsha sarapqa túsken týyndylar 13 atalym boıynsha marapattaldy.
Baıqaý qorytyndysy boıynsha «Brodveı tańdaýy» atalymyn «Dıkıe dnı» fılmi (rej.: Samǵar Rahym) jeńip aldy. Al «Qazylar alqasynyń arnaıy júldesin» Qazaqstan Respýblıkasy Tuńǵysh Prezıdenti – Elbasy qorynyń Almatydaǵy ókildiginiń dırektory Sergeı Tohtarov myrza rejıser Amır Amenovke «Qystyń sońy» fılmi úshin tabystady. Rejıser Berik Jahanovtyń «Asan» fılmindegi ákesin tek janazasynda kórip, bir sátte moınyna jaýapkershilik júgin arqalaǵan 17 jasar bozbalanyń rólin somdaıtyn Azat Jumadil «Úzdik akter» atansa, «Úzdik aktrısa» atalymyn «Samal» (rej.: Shuǵyla Serjan) fılmindegi Janelá Alıkova ıelendi. Jeńimpazǵa arnaıy kınolenta sıpatynda jasalǵan músinsheni prodúser, telejúrgizýshi Alagózova Baıan Maqsatqyzy tabystady. «Úzdik anımasıalyq fılm» jáne «Úzdik qoıýshy-sýretshi» júldesin qazylar alqasynyń múshesi, rejıser, qoıýshy-sýretshi Adaı Ábildınov «İİİ Baıqońyr» kınofestıvaliniń sátti aıaqtalýymen barsha kıno súıer qaýymdy quttyqtaı otyryp, «Órkesh» anımasıalyq fılmi úshin rejıser Ivan Ardashovty marapattady. «Úzdik derekti fılm» atalymy Qazaq Ulttyq óner ýnıversıtetiniń «Kórkem fılmder rejıssýrasy» mamandyǵy boıynsha bilim alyp jatqan, «Ushqyn» stýdenttik kınofestıvaliniń gran-prı ıegeri Nursultan Nusqabekovke «Qasapshynyń bir kúni» týyndysy úshin tabystaldy. Al «Úzdik tájirıbelik fılm» jeńimpazyna «Ia lúblú smotret, kak ýmıraıýt detı» (rej.: Álibek Ábdihalyq) fılmi ilikti. Osy oraıda, tek qana otandyq kórkem fılmder men derekti jobalardy kórsetetin elimizdegi tuńǵysh arna «El arna» telearnasynyń dırektory Arman Baltabaıuly – jas kınogerlerdiń týyndylaryn óz jumystary týraly baıandaýyna múmkindik berip, kórermenderdiń jańa kınolardy tamashalaýyna jol ashatyndaryn jetkizdi. Bul – shyǵarmashylyǵyn endi ǵana bastaǵan jas kınogerlerge telearna tarapynan kórsetiletin asa aýqymdy qoldaý bolmaq.
Sonymen qatar, «Baıqońyr» kınofestıvaline alǵash ret «Úzdik dybys» atalymy enip, rejıser Maııa Ǵalymnyń «Chempıon» fılmi jeńimpaz atandy.
Sondaı-aq, «Úzdik operator» atalymy ásirese derekti fılm túsirýdegi operatorlyq jumystyń kúrdeliligin eskere otyryp, «Uzbek Elegy» fılminiń rejıseri ári operatory Bahtıar Islamovqa buıyrdy.
Kúlli kınosúıer qaýym taǵatsyzdana kútken «Bas júlde» ıegeri rejıser Tımýr Serdalınniń «Qosh bol dosym» fılmi bolyp tabyldy. Sonymen qatar jeńimpaz fılm qazylardyń ádildigine, kórermenniń bıik talǵamyna sáıkes, «Úzdik rejıser» jáne «Úzdik senarı» atalymdary boıynsha da qos marapatqa ilikti.
Ǵaryshty baǵyndyrý ıdeıasymen bastalyp, jyl saıyn aýqymy keńeıip kele jatqan baıqaýdyń keler jyly da óz jalǵasyn taýyp, jas kınogerdiń shyǵarmashylyq ómirine dańǵyl jol asharyna senimimiz kámil.
Aıjan Ecengeldi
T.Júrgenov atyndaǵy QUÓA
«Kınotaný» mamandyǵynyń
IV kýrs stýdenti
