Qorǵasta ońbaı taıaq jep, jaǵy synǵan shekarashy tóbelesti o basta ózi bastaǵan kórinedi. Syrtqy beınebaqylaý kamerasyna efreıtor men tilmash arasynda janjal otynyń tutanǵan sáti túsip qalǵan dep habarlaıdy KTK telearnasy.
Aıypty retinde qamaýǵa alynǵan Ázilhan Ázimhannyń advokaty men jaqyndary endi istiń aq-qarasyn ajyratýdy talap etip otyr.
Esterińizge salaıyq, ótken aptada Qorǵas shekara beketinde tóbeles bolyp, 25 jastaǵy efreıter aýrýhanaǵa jetkizilgen edi.
Basy jarylyp, jaǵy synyp, qanǵa bókken shekarashy Nurjan Moldashtyń vıdeosy áleýmettik jelige jábirlenýshi retinde taraldy. Jaýyngerge judyryq jumsaǵan Ázilhan Ázimhan artynsha qamaýǵa alyndy. Alaıda daýdyń basy kimnen bastalǵanyn baqylaý kamerasyndaǵy jazba taıǵa tańba basqandaı kórsetedi. Áý basta tilmashpen sózge kelgen efreıtor eregisti ózi bastap, soqqyny birinshi bolyp siltegen. Qabaǵy jarylǵannan qany basyna shapqan Ázilhannyń qarymta jasaǵan bir soqqysynan efreıtor sulap túsipti.
Abyr-sabyrdaǵy dabyraǵa jurt úımelep jetkende shekarashy esinen tanyp jatqan. Nurjan Moldash dereý Panfılov aýdandyq aýrýhanasyna jetkizildi. Ázilhan Ázimhannyń advokaty efreıtordyń ózi ekilenip, eregispegende jaǵdaı osylaısha ýshyqpas edi deıdi. Qorǵastaǵy qyrylys qazir oblystyq ishki ister basqarmasynyń baqylaýynda. Tergeý jalǵasyp jatyr. «Bılik ókiline kúsh kórsetý» baby boıynsha is qozǵalǵan. Baqylaý kamerasyndaǵy jazba maı shammen qaralsa, jábirlenýshi men aıyptynyń orny almasýy múmkin be degen suraq kóptiń kókeıinde tur.
