Qazaqstan musylmandary dinı basqarmasynyń tóraǵasy, bas múftı Serikbaı Oraz Aqtóbe oblysyn aralady. Aımaqtaǵy "hıdjab daýyna" qatysty múftı "ata-ana urpaǵyn bilim alýdan shektemeýi tıis" dep sanaıdy. Bul týraly Qamshy.kz aqparat agenttigi Azattyqtyń deregine súıene otyryp jazady.
- Bálıǵat jasyna jetpegen qyz balalardyń, tipti 7-8 jastaǵy qyz balalardy ıaǵnı, jas balanyń taǵdyryn tálkekke, saýdaǵa salý - jańsaq dúnıe. Alla paryz etken, buıyrǵan sáti kelmegenge deıin balaǵa óz kózqarasyn tańý durys emes. Men bas múftı retinde azamattardy túsinistikpen qarym-qatynas jasaýǵa shaqyramyn. Bilim berý oshaqtarynyń talap-tilekterin de jaqsy bilemiz. Biz urpaǵymyzdy bilim alýdan shektemeýimiz kerek, – dedi Qazaqstan musylmandary dinı basqarmasynyń tóraǵasy Serikbaı Oraz.
Bas múftı Aqtóbe oblysynda 26 qyrkúıekke deıin Alǵa, Muǵaljar aýdandaryn aralap shyqpaq. Tilshiniń "Mektep formasyna baılanysty balalaryn sabaqqa jibermeı otyrǵan ata-analarymen kezdesesiz be?" degen saýalyna múftı: "Bálkim, kezdesermin" dep jaýap berdi.
Qazir Aqtóbe oblysynda "mektep formasy talabyn saqtamaǵandyqtan" sabaqqa qatysa almaı otyrǵan 34 oqýshy qyz bar. Aqtóbe oblystyq din isteri departamentiniń dereginshe, olardyń kóbi - bastaýysh synyp oqýshylary.
Eldegi "dinı ahýaly eń kúrdeli aımaq" sanalatyn Aqtóbe oblysynda sońǵy jyldary bılik "teris dinı aǵymdardyń" yqpalyn azaıtýǵa, dinı ekstremızm men terrorzımniń aldyn alýǵa baǵyttalǵan túrli sharalarǵa basa mán bere bastaǵan. Qazaqstan bıligi dinı radıkalızmniń taraýynan saqtaný sharalary retinde "dástúrli dinı qundylyqtardy" belsendi túrde nasıhattaıdy. Keıbir bılik ókilderi oqýshy qyzdardyń hıdjab taǵýyn "jat dinı aǵymdardyń áseri" dep qaýiptenedi.
