Búgin oblys ákimi Amandyq Batalovtyń tóraǵalyǵymen Elbasy N. Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan halqyna Joldaýyn talqylaýǵa arnalǵan óńirlik aktıv jıyny ótti. Jıynda Joldaýdy júzege asyrýdaǵy oblystyq atqarýshy organdardyń mindetteri týraly másele qaraldy.
Oblys ákimi A. Batalov Prezıdenttiń bul Joldaýy osyǵan deıin júzege asyrylyp jatqan strategıalyq bastamalardyń zańdy jalǵasy ekenin atap ótti. Ár otbasynyń, árbir adamnyń jaǵdaıyn, tirshilik ortasyn jaqsartýǵa arnalǵan Joldaýdy oryndaýǵa jergilikti atqarýshy organdar búginnen bastap kirisýi kerektigin qadap aıtty.
Aldymen Joldaýdy talqylaý boıynsha Kóksý aýdanyndaǵy Q. Jalaırı atyndaǵy mektep-gımnazıa dırektorynyń orynbasary Aıdyngúl Nurdáýletova sóz aldy. Onyń aıtýynsha, bıylǵy Joldaýda aıtylǵan pedagogtardyń mártebesin anyqtaý isi kópten sheshimin kútken másele edi. Sonymen qatar jyldyń basty qujatynda úsh aýysymdy mektepter máselesin sheshýge de erekshe nazar aýdarylǵany qýantady. «Ótken jyly oblysta «Nurly jol» baǵdarlamasymen 33 mektep salynsa, bıyl 9 jańa mektep paıdalanýǵa berilgen. Sizder mektep salyp bere berseńizder, biz qansha bala bolsa da oqytýǵa qýana kirisemiz», - dedi A. Nurdáýletova.
Sol sıaqty oblystyq perınataldy ortalyqtyń dárigeri Elena Osıpova medısınalyq qyzmet kórsetý sapasyn arttyrýda, densaýlyq saqtaý salasyn sıfrlandyrýda ózderine júktelip otyrǵan mindettiń zor ekenin aıta kele, oǵan qol jetkizýge oblysta barlyq múmkindikter jasalyp otyrǵanyn jáne soǵan sáıkes sapaly jumys isteıtindikterin aıtty.
Jıynda, sondaı-aq, aýyl sharýashylyǵy, sport, jastar isi salalary boıynsha da mamandar sóz alyp, Joldaýǵa qatysty óz oı-pikirlerin bildirdi.
Munan soń Joldaý tapsyrmalaryna saı qaı salada qandaı mindetter kútip turǵany, qaı baǵyttarǵa basymdyq berilýi tıistigi jaıynda oblys ákimi A. Batalov naqty mindetterdi belgilep berdi.
Oblys basshysynyń aıtýynsha, Ekonomıka jáne búdjettik josparlaý basqarmasy qysqa merzimde Elbasynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan halqyna Joldaýyn iske asyrý jónindegi is-sharalar josparyn ázirlep, sol jospar basshylyqqa alynatyn bolady.
Bıylǵy Joldaýda «Bıznestiń jol kartasy-2020» baǵdarlamasyn jyl saıyn somasy 30 mlrd. teńgege qosymsha qarjylandyra otyryp, 2025 jylǵa deıin uzartý tapsyrylǵan bolatyn. Máselen, baǵdarlama bastalǵannan beri oblys kásipkerleri úshin 1219 jobany iske asyrýǵa 30,6 mlrd.teńgege qoldaý kórsetilgen, jeti myń segiz júz jumys orny ashylyp, 26 myń jumys orny saqtalǵan. Sonyń nátıjesinde shaǵyn jáne orta bıznes sýbektileriniń sany 115 myńnan asyp, jergilikti búdjettegi úlesi bir jyl ishinde 39% prosenten 53% prosentke ósken, al jalpy óńirlik ónimde jyl sońynda 28%-ti quraıdy.
Elbasy tapsyrmasyna sáıkes aktıv jıynynda oblys ákiminiń orynbasary J. Tuıaqovqa, kásipkerlik basqarmasyna óńir kásipkerlerine qoldaý kórsetý maqsatynda qosymsha qarjy alý úshin naqty sharalar qabyldaýdy tapsyryldy.
- Aýyl sharýashylyǵynda oblys jaqsy kórsetkishterge jetip keledi. Qant qyzylshasy, júgeri ósirý, óńdeý isin jolǵa qoıdyq. Alaıda biz osy jetistikterimizben toqtap qalmaýymyz kerek. Sondyqtan bir aı ishinde oblystaǵy AÓK damytýdyń óńirlik baǵdarlamasyn ázirlep, bekitip, baǵdarlama ishine 9 basym baǵytty belgileýdi tapsyramyn. Sonyń ishinde, etti-sútti mal sharýashylyǵy, qoı sharýashylyǵy, basymdyq beriletin daqyldar, ıntensıvti baqtar, jylyjaı sharýashylyqtary jáne t.b. bar, - dep atap ótti A. Batalov.
Sonymen qatar bilim berý mekemelerin beınebaqylaýmen qamtamasyz etý, apatty jáne úsh aýysymdy mektepter máselesin sheshýge qatysty da naqty mindetter júkteldi. Máselen, ishki mıngrasıa men demografıalyq ósimniń nátıjesinde úsh aýysymda oqytatyn burynnan bar mektepterdiń qataryna ótken jyly 11 mektep qosylsa, bıyl taǵy 13-i qosylyp otyr, sóıtip olardyń sany qazirgi kezde 34-ti quraıdy.
- Oblys ákiminiń birinshi orynbasary L. Turlashov pen tıisti basqarmalarǵa 15 mekteptiń jobalyq-smetalyq qujattaryn daıyndaýdy aıaqtaýdy, jańa 11 úshaýysymdy mekteptiń qujattaryn ázirleýdi tapsyramyn. 11 mekteptiń qujattaryn ázirleýge qajetti qarjyny jýyq arada ótetin búdjetti naqtylaý kezinde qarastyrýymyz kerek.
Elimizde «7-20-25» baǵdarlamasy bastaldy, alaıda bizdi áli kúnge deıin satyp alýshylardyń tolyq pýly qalyptastyrylmaǵan. Ekinshi deńgeıli bankter somasy 849 mln.teńgege 73 ótinim ǵana qabyldaǵan, onyń 53-i maquldanyp, 4 páter berilgen. Sondaı-aq, «Nurly jer» baǵdarlamasy sheńberinde jaldamaly jáne nesıelik turǵyn úılerdiń iske qosylýyn ulǵaıtý qajet. Oblys ákiminiń orynbasarlary L. Turlashov pen A.Baıjanovqa turǵyn úı salý úshin jeke ınvestorlar tartý máselesin pysyqtaýdy, sondaı-aq jeńildetilgen ıpoteka boıynsha alǵashqy jarnany ishinara sýbsıdıalaý boıynsha usynys engizýdi tapsyramyn, - dedi oblys basshysy.
Oǵan qosa jıyn barysynda polısıa qyzmetiniń jumysyn jetildirý, medısına salasyn sıfrlandyrý, búdjettik qyzmetkerlerdiń jalaqysynyń ósýine baılanysty qajetti qarjyny 2019 jyldyń búdjetinde qarastyrý, turǵyn úı-kommýnaldyq sharýashylyq pen tabıǵı monopolıalar qyzmetteri úshin tarıfterdiń belgilenýi men jınalǵan qarjyny jumsaýdyń ashyqtyǵyn qamtamasyz etý, týrızmdi damytý boıynsha arnaıy uıym qurý týraly usynys engizý, bir aı merziminde memlekettik apparatta ońtaılandyrý júrgizip, kelesi jyldyń basynan eńbekaqy tóleýdiń jańa modelin engizý, oblys ekonomıkasyna ınvestorlar tartý, «Nurly jol» jáne «Nurly jer» baǵdarlamalaryn iske asyrý merziminiń 2025 jylǵa deıin uzartylýyna oraı eldi mekenderdiń perspektıvalyq damý josparlaryn eskere otyryp, qosymsha ınfraqurylymdyq jobalar tizbesin qurý júkteldi. Sonymen qatar kelesi jyldyń Jastar jyly bolyp jarıalanýyna jáne "Aýyl – El besigi" arnaıy jobasynyń iske qosylýyna baılanysty da mindetter aıqyndaldy.
- Joldaýdy halyq arasynda túsindirý óńirde qurylǵan aqparattyq nasıhat toptarynyń jumysy bolsa, naqty iske asyrý - jergilikti atqarýshy organdardyń mindeti. Sondyqtan oblysta daıyndalǵan jospardyń ár tarmaǵy boıynsha tıisti aımaqtar men salalar basshylary tyńǵylyqty jumys atqarýy tıis jáne bul úshin ár basshy derbes jaýap beredi, - dedi A. Batalov.
