E-commerce ortalyǵynda onlaın saýdamen aınalysqysy keletin kásipkerler úshin bar jaǵdaı jasalǵan. Bul týraly «Qazposhta» AQ elektrondy saýda departamentiniń dırektory Mustafın Sultan E-commerce Meet UP-ta tilshilerge bergen suhbatynda málimdedi.

 Sharany ótkizýdegi basty maqsat elektrondy saýdamen aınalysatyn seriktesterdi iske shaqyrý, osy arqyly elektrondy saýda naryǵyn alǵa shyǵarý.

«E-commerce ortalyǵy ınternet bıznespen aınalysatyn kásipkerlerge qyzmet kórsetý bólimshesi. Qazposhta árdaıym bul júıeni logıstıka retinde usynyp otyrdy. Endi biz naqty bıznesti damytýǵa bel býdyq. Iaǵnı ózimiz emes, kerisinshe osy salada jumys jasaýǵa qulshynys bildiretin kásipkerlerdi tartý arqyly. Dálirek aıtsam  ózgelerdi tartý arqyly Qazaqstandaǵy elektrondy saýdanyń órkendeýine úles qosý. Ol úshin elektrondy saýda qyzyqtyratyn seriktesterdi shaqyryp, osy ortalyqta olarǵa ınternet-dúkender, marketıń, satý bólimimen tanystyratyn jıyndar uıymdastyryp otyramyz», – dedi Mustafın Sultan.

Sondaı-aq, semınar barysynda E-commerce ortalyǵynyń atqarýshy dırektory Nurlyhan Hamzat ınternet-saýdany bastaǵandaǵy alǵashqy tájirıbesimen bólisti.

«Alǵashynda biz shaǵyn ǵana keńse ashyp, jumysymyzdy bastaǵanbyz. Eń alǵashqy taýarymyz kádimgi kókónis keskish qural boldy. Syrt kózge oǵash estiletin bolar, biraq biz ınternet-saýdany dál osylaı 8 naýryzdyń aldynda bastadyq. Eń alǵashqy kúnniń ózinde bizdiń taýarǵa 200 adam qyzyǵýshylyq bildirip, tapsyrys berdi. Al bizde bar joǵy 50 kókónis keskish qural bolatyn. Odan ári jumysymyzdy jalǵastyryp basqa da taýarlardy tikeleı zaýytqa tapsyrys berý arqyly sata bastadyq. Barlyǵyn ózimiz jarnamalap, satyp jáne taýardy satyp alýshyǵa jetkizip otyrdyq», – dedi Nurlyhan Hamzat.

Aıta ketelik, sharada atalǵan ortalyqtyń bilikti mamandary kásipkerlerdi óz qyzmetterimen tanystyryp, tereńdetilgen keńes alýǵa shaqyrdy. Olardyń ishinde ınternette jarnamalaý, marketıń, taýardy jetkizý, fýlfılment, CRM júıesi boıynsha mamandar qatysty.