16 qazan kúni «Qazposhta» AQ uıymdastyrýymen Elorda turǵyndaryna arnalyp «E-commerce Meet UP» ótkizildi.

Meet UP-ta elektrondy saýdadaǵy kásipkerlerdi qyzyqtyratyn trendter jaıynda aıtyldy.

Shara barysynda spıkerler ınternet marketıńke salystyrmaly taldaý jasap, negizgi uǵymdarymen tanystyrdy. Sonyń ishinde landing page, ınternette satý qyzmeteri men quraldary, targettik jarnamalar.

«Qazposhta» AQ elektrondy saýda departamenti dırektorynyń aıtýynsha negizgi maqsat elektrondy saýdamen aınalysatyn seriktesterdi iske shaqyrý, osy arqyly elektrondy saýda naryǵyn alǵa shyǵarý.

«Biz búgin e-commerce ortalyǵyndamyz. Bul jalpy aıtqanda ınternet bıznespen aınalysatyn kásipkerlerge qyzmet kórsetý bólimshesi. Qazposhta árdaıym bul júıeni logıstıka retinde usynyp otyrdy. Endi biz naqty bıznesti damytýǵa bel býdyq. Iaǵnı ózimiz emes, kerisinshe osy salada jumys jasaýǵa qulshynys bildiretin kásipkerlerdi tartý arqyly. Dálirek aıtsam  ózgelerdi tartý arqyly Qazaqstandaǵy elektrondy saýdanyń órkendeýine úles qosý. Ol úshin elektrondy saýda qyzyqtyratyn seriktesterdi shaqyryp, osy ortalyqta olarǵa ınternet-dúkender, marketıń, satý bólimimen tanystyratyn jıyndar uıymdastyryp otyramyz», – dedi Mustafın Sultan.

Sonymen birge sharada atalǵan ortalyqtyń bilikti mamandary kásipkerlerdi óz qyzmetterimen tanystyryp, tereńdetilgen keńes alýǵa shaqyrdy.

«E-commerce ortalyǵynyń jumysy kásipkerlerge baǵyttalǵan. Biz sizderge kelesi qyzmetterdi usynamyz: ınternet marketıńti basqarý, aýtsorsıng býhgalteri, CRM júıesi, satý bólimi, onlaın satý boıynsha óz saıtyn qurý. Sizge yńǵaıly bolý úshin kórshi zalda mamandar otyrady jáne olar sizge keńes berýge daıyn», – dedi E-commerce jobasynyń jetekshisi Dúısenbaev Erkebulan.