Túrkistan oblysynyń ákimi Janseıit Túımebaev Saryaǵash aýdanyna sapary barysynda óńirdegi ortalyq aýrýhanaǵa arnaıy aıaldady. Mekemeniń ınsýlt ortalyǵyndaǵy sońǵy zamanaýı qurylǵymen jabdyqtalǵan tomografıa kabınetin salanatty túrde ashyp berdi. Ondaǵy jańadan ornatylǵan kompúterlik tomografıanyń jumysymen tanysty. Sondaı-aq, oblys basshysy saryaǵashtyq dárigerlerge 3 avtokóliktiń kiltin tapsyrdy. Bul ıgilikti ister Elbasynyń medısına salasyna jasaǵan qoldaýynyń nátıjesinde bolyp jatqanyn tilge tıek etken óńir basshysy aýrýhana ujymyna sáttilik tiledi.
«Memleket basshysy qashanda eldiń deniniń saýlyǵyna úlken kóńil bólip keledi. Qazir oblysymyzda modýldi pýnkter salynyp, dárigerlerge arnalǵan arnaıy turǵyn úıler de boı kóterip jatyr. Qazirgi tańda turǵyndarǵa sapaly mamandandyrylǵan qol jetimdi medısınalyq qyzmet usynyp, medısınalyq mekemelerdiń materıaldyq-tehnıkalyq bazasyn nyǵaıtyp kelemiz. Deı turǵanmen aýyryp em izdegenshe, aýyrmaý úshin kópshilikti sportmen shuǵyldanýǵa shaqyramyn», - dedi Janseıit Qanseıituly.
Saryaǵash aýdandyq aýrýhanasynda ashylǵan jańa tomografıalyq kabınet aldaǵy ýaqytta óńir turǵyndarynyń densaýlyǵynyń saýlyǵy úshin qyzmet etpek.
