Taıaýda Túrkistan oblysy ákimdigi men QR Memlekettik qyzmet isteri jáne sybaılas jemqorlyqqa qarsy is-qımyl Agenttiginiń Túrkistan oblysy boıynsha departamentiniń uıymdastyrýymen bilim berý salasyndaǵy sybaılas jemqorlyqtyń deńgeıin tómendetý máseleleri talqylanǵan jıynnan BAQ-ta qate málimetter jarıalandy.
Atalǵan jańsaq málimetterdi Túrkistan oblysy ákiminiń baspasóz qyzmeti teriske shyǵaryp, tómendegini habarlaıdy. 
Atap aıtqanda, májiliste QR Memlekettik qyzmet isteri jáne sybaılas jemqorlyqqa qarsy is-qımyl Agenttiginiń Túrkistan oblysy boıynsha departamentiniń basshysy Ǵ.Tursynbaev sońǵy úsh jylda respýblıka boıynsha bilim salasyndaǵy jemqorlyq aıasynda 513 qylmystyq is qozǵalyp, 305 tulǵa qylmystyq jaýapkershilikke tartylǵanyn málimdegen. Bul respýblıkalyq kórsetkish bolyp tabylady.
Al, Túrkistan oblysynda sońǵy úsh jylda bilim salasynda sybaılas jemqorlyqqa qatysty 50 jaǵdaı tirkelgen. Búginde birqatar tulǵalar qylmystyq jaýapkershilikke tartylǵan. 
Jyl basynan bergi jaǵdaıǵa toqtalsaq, oblystyq bilim basqarmasynyń basshysy I.Saǵyndyqovtyń málimetinshe, 2018 jyldyń 8 aıynda oblys aýmaǵynda bilim berý uıymdarynyń laýazymdy tulǵalarymen jasalǵan 6 sybaılas qylmystyq is tirkelgen. Onyń 4-ýi mektep dı⁠rektorlary bolsa, 1-ýi tehnıkalyq qyzmet kórsetýshi men bir jetekshi maman tartylǵan. Bul rette aıta byltyrǵy tıisti merzimmen salystyrǵanda arnaıy jumystardyń nátıjesinde, óńirimizdegi ahýal jaqsaryp, bes faktige azaıyp otyr. Ótken 2017 jyldyń 8 aıynda sybaılas jemqorlyqqa qatysty 11 jaǵdaı tirkelgen bolatyn.
Búginde basqarma tarapynan sybaılastyqtyń aldyn alýǵa baǵyttalǵan oblystyq deńgeıde tıisti jumystar atqarylýda. Mektepke deıingi bilim berý uıymdaryna joldama berý jáne kezekke qoıý prosesin avtomattandyrý qolǵa alynyp, búgingi kúnge 481 mekeme nemese barlyq 1368 mektepke deıingi mekemelerdiń 35 paıyzy osy júıemen jumys júrgizýde. Jyl sońyna deıin balabaqsha.sitcen.kz portalyna balabaqshalardyń 100 paıyzyn qosý josparlanýda. Júıe qyzmetimen búginde 12 myńnan astam búldirshin balabaqshaǵa ornalasqan. 
Oblystyń 902 (100%) mektebinde jumys.sitcen.kz júıesi endirilgen. Búginge deıin atalǵan júıe qyzmeti arqyly 933 bos jumys oryn jarıalanyp, 321 adam jumysqa ornalasqan.