Almaty qalasynda «Alataý» dástúrli óner teatrynda 15 qazanda elimizde tuńǵysh ret teatrlandyrylǵan poetıkalyq jyr keshi ótti dep jazady Qamshy.kz aqparat agenttigi. 

Keshte aqyn Maǵıza Qunapıaqyzy men Qaırat Qulmuhamedtiń óleńderine qoıylǵan «Óleń sózdiń patshasy» atty poetıkalyq sahnalanǵan qoıylym kórsetildi.

Kesh shymyldyǵyn ashqan Qazaqstan Jazýshylar odaǵy tóraǵasynyń orynbasary Baqyt Bedelhan aldaǵy ýaqytta osyndaı keshter jalǵasyn tabatynyn aıtty.

"Búgingi úlken kesh nar táýekeldiń keshi, ıaǵnı Sóz patshasynyń taǵyna qonǵan kúni deı kele, jyr keshi degen ásheıin sahnaǵa shyǵyp óleń oqý emes, ony sahnalanǵan kóriniske aınaldyrý, halyqqa jetkizý kerek ekendigin tilge tıek etti. Ár memlekette osyndaı poetıkalyq keshterdi uıymdastyratyn teatrlary bar, bizde bul joq, bul Raıymbek Seıtmetov aǵamyzdyń Músirepov teatryn Poezıalyq teatrǵa aınaldyrsam degen armany. Qaı jaǵynan da qısyny kelip turǵan nárse. Táýelsizdik kúnine oraı, «Qasqyr Qudaı bolǵan kez» degen poetıkalyq-drama jazyp jatyrmyn. Jartysyn jazyp qoıdym. Daıyn. Sony bolashaqta Beıbit pen Sánıanyń qolyna tapsyramyn", - dedi Baqyt Bedelhan sóz arasynda. Aqyn jáı sóılemeı, jyr keshiniń shymyldyǵynyń ashylýyna jyrdan shashý shashty. Aldaǵy ýaqytta Jazýshylar odaǵynyń janynan «Sóz patshasy» atty poetıkalyq teatr ashylatynyn, aqyndardyń shyǵarmashylyq keshteri osyndaı formatta ótetinin habarlady.

Keshti Ǵabıt Músirepov atyndaǵy Jastar teatrynyń akterlary Beıbit Qoramanov pen Sánıa Erzatqyzy júrgizdi. Keshke tanymal tulǵalar, óner qaıratkerleri jáne jyr súıer qaýym qatysty. Teatrlandyrylǵan bul ózgeshe kesh kórermenderdiń kóńilinen shyqty. Ár kóriniske rızalyshyqpen shapalaq urǵan kópshilik qaýym osy keshtiń ereksheligin sezindi.

Kesh sóz alǵan Dúnıejúzi qazaqtary qaýymdastyǵynyń Almaty qalasy jáne oblystyq fılıalynyń dırektory Aıbópe Maqulbekova hanym keshti uıymdastyrýshylarǵa rahmet aıtyp, aqyndarǵa arnaıy Alǵys hat tabys etti.

Ásel Nazaraly