Jas ulan respýblıkalyq mektebiniń irgetasy 1999 jyly qalanǵan bolatyn. Mektepke armıa generaly, Keńes odaǵynyń batyry, №1 Halyq qaharmany, №1 Qorǵanys mınıstri S.Q.Nurmaǵambetov atamyzdyń qurmetine esimi berildi. 1999 jyly 4 qarashada El prezıdenti, QRQK-niń joǵarǵy bas qolbasshysy N.Á.Nazarbaevtyń qatysýymen mekteptiń saltanatty ashylý rásimi boldy. Táýelsiz Qazaqstannyń qarýly kúshteri úshin osyndaı oqý ornyn qurý Elbasynyń tyń ıdeıasy.
Búgingi tańda jıyrma jyldyq tarıhy bar mektepte qazaqstannyń túpkir-túpkirinen kelgen jas órender, san-ultty Qazaqstannyń ókilderi bir shańyraq astynda aırandaı uıyp, óz bilimderin jalǵastyryp, erinbeı eńbektenýde.
Jas ulan Respýblıkalyq mektebiniń basty mindeti – árbir tárbıelenýshisiniń ultyna adal, antyna berik, otansúıgish, ınternasıonalızmdi bolyp qalyptasýy. Sol jolda mektep ulandary búginde bilikti áskerı komandalyq quram jáne bilimdi ustazdardan tárbıe men bilimdi qatar boıǵa sińirip otyr. Osyndaı mamandardyń arqasynda Jas ulan mektebin – Otanynyń berik qorǵandary, keshegi Abylaı men búgingi Saǵadattyń izbasarlary úzdik kórsetkishpen támamdaýda.
Mektep tárbıelenýshileri oqytýdyń jańa úlgisinde bilim alyp, kúsheıtilgen dene daıyndyǵyn, áskerı pánderdi, memlekettik jáne shet tilderdi tereń meńgerýde. Aldymyzda mektebimizdiń 20 jyldyq mereıtoıy kele jatyr. Jıyrma jyldyq mereıtoı qarsańynda ulandar qoǵamdyq is-sharalarǵa belsene qatysyp, mádenı kópshilik ortada óz bilimderi men ónerlerin synap baıqaýda. Jas ulandyqtar boıynan tek otan qorǵaýshylyq qasıet qana emes, sonymen qatar segiz qyrly bir syrlylyq ta tabylady.
Jas ulandyqtar úshin S.Q.Nurmaǵambetov – aty ańyzǵa aınalǵan, ómir joly ónegeli, birtýar ańyz adam. Osyndaı batyr atamyzdyń esimi berilgen oqý ornynda tárbıe alý – bizder úshin úlken qurmet, abyroı. Biz Jas ulan respýblıkalyq mektebiniń tárbıelenýshileri Nurmaǵambetovshy ekenimizdi esten shyǵarmaýymyz kerek.
Patrıotızmniń ushqyny boıynan tasyǵan Nurmaǵambetovshylardyń aldyńǵy býyny qazirgi tańda QRQK-niń joǵarǵy oqý ornynda bilimin jalǵastyryp jatsa, keıingi býyny óziniń otan aldyndaǵy boryshyn mańdaıdan ter shyǵa, Halyq qaharmany Baýyrjan Momyshuly aıtpaqshy «El degende emirenip, jer degende tebirenip» óteýde.
Búgingi Jas ulandyqtar QR QK-niń erteńgi bolashaǵy desem sózime eshkim shúbá keltirmes. Óz elim, elim úshin bárine tózemin, eldigim úshin jer shardy kezemin, basymyzǵa kún týsa tolarsaqtan qan keshemin degen eren erler urpaǵy Jas ulan mektebinde tárbıelenýde. Qazaqta «Er eli úshin týady, eli úshin óledi» degen sóz bar. Sol erlerińiz biz bolarmyz, kim biledi?
Uly Otannyń ulandary
Boıymyzda saq babanyń sabyrlyǵy
Oıymyzda alty alashtyń aýyr muńy
Erlerim azattyqty arman etti
Bergen joq pa qabyl qyp táńir muny
Berekemen molaısyn yrys búgin
Bir ózińe arnaıyn jyr ushqynyn
Jasaı bersin otandy qorǵaýshylar
Kúzetken azat eldiń tynyshtyǵyn
Qazaqtyń samǵaıtuǵyn qyranymyz
Taýsylmasyn máńgilik jyr ánimiz
Qazaqstan deıtuǵyn uly Otannyń
Qaıtpas qaısar qaıratty ulanymyz
Aqtaǵan aq úmitin analardyń
Eńbegin erlerimniń baǵalar kim
Búgingi biz bolamyz ulandary
Keshegi ótken bahadúr babalardyń
S.Q.Nurmaǵambetov atyndaǵy
Jas ulan respýblıkalyq mektebiniń
ulany Muhamet Nurjanat
