Ekpeni júrgizý úshin «Grıppol plús» atty reseılik vaksınanyń 45 myń dozasy satyp alynǵan. Bıyl DSU uıymynyń boljamy boıynsha Mıchıgan – A (N1N1), Sıngapýr – A (H3N2), Kolorado – B atty úsh túrli shtama kútilýde.
-Biz ekpe salynatyn kontıngentterdi bólip qoıdyq. Júkti áıelder, jıi aýyratyn balalar, júrek-qan tamyrymen aýyratyn adamdar, balalar úıi men qarttar úıinde turatyndar, medısına qyzmetkerleri tegin, al ózge turǵyndar aqyly túrde ekpe qabyldaıdy. Aqyly ekpe qaladaǵy «Interteach», «Chakýr» jáne «Vital Prestige» klınıkalarynda júrgiziledi. Atalǵan klınıkalarda golandıalyq (3500 teńge) jáne reseılik (1600 teńge) vaksına bar, — Mańǵystaý oblystyq qoǵamdyq densaýlyq saqtaý demartamentiniń basshysy deıdi Bekmurat Buqaruly.
Atalǵan ekpe egilgen soń 15-20 kúnde ımýnıtet qalyptasady. Mamandar aýrý naǵyz qyzatyn mezgilge qaraı aǵza oǵan qarsy turýǵa qaýqarly bolmaq degendi aıtady. Vaksınanyń kúshi 1 jylǵa jetkilikti.
-Byltyrǵy maýsymda da Reseıde shyǵarylǵan «Grıppol plús» vaksınasyn qoldandyq. Ol ıyq bulshyq etine salynady. 6 aı men 3 jas aralyǵyndaǵy balalarǵa 0,25 ml kóleminde bir aı ıntervalymen 2 ret egiledi. Al 3 jastan asqan balalarǵa tolyq doza 0,5 ml mólsherde salynady, — deıdi Qoǵamdyq densaýlyq saqtaý departamentiniń epıdemıologıalyq baqylaý bóliminiń jetekshisi Gúlshat Shorbasova.
Búgingi tańda barlyq aýdan, qalalardaǵy emhanalarǵa vaksına jetkizilgen. 2017 jyly vaksınaǵa 30 mln 502 myń qarajat bólinse, bıyl 38 mln 664 myń teńge jumsalǵan. MO densaýlyq saqtaý basqarmasynyń basshysy Talǵatbek Bapıev oblys emhanalary tolyqqandy daıyn degendi alǵa tartty.
-Qazirgi tańda maýsymdyq aýrý – tumaýǵa Mańǵystaý boıynsha daıyndyq barysy jaqsy. Qosymsha emhanalarǵa shaqyrý men keńes berý úshin 64 telefon ornatylyp jatyr. Qazirgi tańda 50 avtokólik jáne 180 tósek oryn daıyn. Dári-dármektiń bári rezervte bar, qamtamasyz etilgen. Búginde Aqtaý qalasynda 17 Jedel járdem brıgadasy qyzmet etedi, — deıdi ol.
Mańǵystaý respýblıkadaǵy tumaý birinshi anyqtalatyn óńirler qatarynda. Munyń sebebin mamandar oblystyń 5 elmen shekaralas bolýymen baılanystyrady.
-Kaspıı teńizi arqyly birneshe elmen kórshi otyrmyz, qustardyń ushyp kelýi de áser etedi. Vırýs jan-jaqtan kelýi múmkin. Byltyr oblysta grıpp maýsymy qańtar aıynyń alǵashqy aptasynda bastaldy, — degendi aıtty Gúlshat Syrymbetqyzy.
Ótken jyly 146 grıpp zerthanamen rastalǵan. Onyń 65-i balalar arasynda tirkelgen. Dárigerler bolashaqta ekpe alatyndar qataryn 70 myńǵa deıin jetkizýdi josparlap otyr.
