Mańǵystaýlyq belgili shahmatshy Saǵyndyq Rabaevty eske alýǵa arnalǵan «Aktau Chess Open-2018» halyqaralyq týrnıri 12-14 qazan kúnderi «Abaı» mádenı-demalys kesheninde ótti.
Sharanyń saltanatty ashylý rásiminde Mańǵystaý oblystyq máslıhat hatshysy S.Trumov, MO máslıhat depýtaty Q.Ábdirahman, «Nur Otan» partıasy MOF tóraǵasynyń birinshi orynbasary N.Tumyshev quttyqtaý lebizderin bildirdi. Týrnır dárejeli shahmatshylardyń (grosmeısterler men sport sheberleriniń) qatysýymen erekshelendi.
-Týrnırdi elimizge belgili mańǵystaýlyq shahmatshy, shahmattan sport sheberligine úmitker Saǵyndyq Rabaevtyń qurmetine eske alý sharasy retinde arnadyq. Qazaqstandyq shahmattyń qalyptasýy men damýyna ózindik úlesi bar Saǵyndyq Rabaevty kórgen azamattar onyń kishipeıildiligi men adamgershilik qasıetin erekshe ataıdy. Sondaı jandardyń biri ekenime qýanamyn. Onyń aıyryqsha tapqyrlyǵy men este saqtaý qabileti, talanty men talaby zamanynda kóptiń yqylasyna shabyt bergeni ras, — dedi S.Rabaevtyń dosy Ábdirahman Qýanyshbek.
Saǵyndyq Rabaev 1962 jyldyń 27 qyrkúıeginde Ózbekstan Respýblıkasy, Qaraqalpaqstan, Hojeli qalasynda dúnıege kelgen.
1969 jyly Hojeli qalalyq A.P.Chehov atyndaǵy jalpy bilim beretin orta mektep tabaldyryǵyn attap, 1979 jyly ozat túlek qatarynda bitirip shyǵady.
1979 jyly Qaraǵandy polıtehnıkalyq ınstıtýtynyń «Azamattyq jáne ónerkásiptik qurylys fakúltetine» oqýǵa túsedi.
Shahmatqa qyzyǵýshylyǵy basym S.Rabaev ınstıtýt qabyrǵasynda shahmat seksıasynyń belsendisi boldy. Stýdenttik kezinde-aq 1984-1985 jyldary eki jyl qatarynan Qaraǵandy qalalyq shahmat týrnıriniń chempıony atandy.
1985 jyly joǵary oqý ornyn ınjener-qurylysshy mamandyǵymen aıaqtap, eńbek jolyn «Tahıatashgıdroenergostroı» qurylys basqarmasynan bastaǵan. Óndiristik-tehnıkalyq bólimniń tehnıgi qyzmetine qabyldanǵan.
Ózbekstan Respýblıkasynyń týrnırlerinde eki dúrkin chempıon bolǵan.
2001 jyly ata qonys Mańǵystaýǵa oralyp, «Vızır» jaýapkershiligi shekteýli seriktestigine bas maman qyzmetine ornalasqan.
2003-2005 jyldar aralyǵynda «Altynquryq» jaýapkershiligi shekteýli seriktestiginiń bas ınjeneri qyzmetin atqarǵan.
Saıysqa Qazaqstanmen qatar Reseı, Ázirbaıjan, Belorýs, Ózbekstan shahmatshylary da qatysty.
Týrnırdiń alǵashqy kúninde belgili shahmatshy, «Qara qabylan» («Chernaıa pantera») laqap atymen óner kórsetip júrgen bes dúrkin álem chempıony Bıbisara Asaýbaeva 13 jas shahmatshymen bir mezettik kezdesý ótkizdi.
Saıystyń alǵashqy 2 kúni Rapıd týrnır, jabylý rásiminde Blıs Týrnır uıymdastyryldy. Jeńimpazdarǵa dıplomdar men aqshalaı syılyqtar tabystaldy.
