Mańǵystaý oblysyndaǵy eń kóne aýdan Mańǵystaý aýdany qurylǵanyna 90 jyl toldy. Osyǵan oraı eki kúnge arnalǵan mereıtoılyq sharalar josparlandy.
Aýdannyń qurylýy men qalyptasýyna úles qosqan birqatar azamattarǵa Mańǵystaý aýdanynyń 90 jyldyq mereıtoıyna oraı aýdannyń «Qurmetti azamaty» ataǵy berilip, merekelik medaldar tapsyryldy.
Sonymen qatar aýdannyń mereıtoıyna oraı birqatar nysan paıdalanýǵa berildi. Olardyń qatarynda Jyńǵyldy aýylynda, Shetpe-1 shaǵynaýdanynda, Qosbulaq aýylynda ashyq sport alańy, Tushshybek aýylynda, Ushtaǵan aýylynda 4 páterli mýnısıpaldy turǵyn úı bar.
Sharanyń ekinshi kúni ortalyq parkte aǵa býyn ókilderiniń 30 jyl buryn «Bolashaq urpaqqa arnap qaldyrǵan hatyn» ashý rásimi ótti. Sonymen qatar, alaman báıge, qunan, taı jarystary, teńge alý syndy ulttyq oıyndar uıymdastyryldy.
mangystaumedia.kz málimetinshe, Mańǵystaý osydan 90 jyl buryn Búkilreseılik Ortalyq Atqarý Komıtetiniń «Qazaq SSR Avtonomıasyn aýdandastyrý týraly» 1928 jyldyń 3 qyrkúıegindegi №743 qaýlysy boıynsha Adaı okrýginiń quramynda quryldy. Ol kezde jańa aýdannyń ortalyǵy Fort-SHevchenko qalasy edi.
1939 jyldyń 16 qazanynda Qazaq SSR Joǵarǵy Keńesiniń Jarlyǵy boıynsha Mańǵystaý aýdany eki aýdanǵa bólingen. Onyń biri – ortalyǵy Fort-SHevchenko qalasy bolatyn Shevchenko aýdany bolsa, ekinshisi – ortalyǵy Kýıbyshev selosy bolatyn Mańǵystaý aýdany. 1940 jyly aýdan eńbekshileriniń ótinishi boıynsha Gýrev oblystyq Keńesi atqarý komıtetiniń sheshimi boıynsha aýdan ortalyǵy Taýshyq poselkesine (Sosıalısik gorodok) kóshirilgen.
Aýdannyń qazirgi ortalyǵy Shetpe selosyna 1964 jyly 15 mamyrda kóshirildi.
90 jyldyq mereıtoıyn toılap jatqan Mańǵystaý aýdanynda búginde 38700 adam turady, 7 aýyldyq okrýg, 5 aýylǵa qarasty barlyǵy 21 eldi meken bar.
