18-19 qazan kúnderi Mańǵystaý oblysy mádenıet basqarmasynyń bastamasymen, Mańǵystaý oblysy ákimdiginiń qoldaýymen Qazaqstannyń eńbek sińirgen ártisi, Qurmanǵazy atyndaǵy Qazaq ulttyq konservatorıasynyń Qurmetti profesory, «Qurmet» ordeniniń ıegeri, kúıshi Roza Aıdarbaevanyń shyǵarmashylyǵyna arnalǵan respýblıkalyq kúıshi qyz-kelinshekter baıqaýy ótti.
Eki kúnge sozylǵann óner saıysyna 23 dombyrashy qatysty. Olar elimizdiń Qaraǵandy, Aqtóbe, Atyraý, Qyzylorda, Shyǵys Qazaqstan, Mańǵystaý, Batys Qazaqstan oblystarynan jáne Astana, Almaty qalalarynan jınaldy.
Roza Aıdarbaeva ózi basshylyq etken qazylar alqasynyń quramynda Qazaqstannyń eńbek sińirgen qaıratkeri, Qurmanǵazy atyndaǵy Qazaq ulttyq konservatorıasynyń profesory Kárıma Súndetqyzy Saharbaeva, QR mádenıet qaıratkeri, Qazaq Ulttyq óner ýnıversıtetiniń oqytýshysy Gúlperızat Eleýsizqyzy Ultaraqova, Qazaqstannyń eńbek sińirgen qaıratkeri, Abyl Taraquly atyndaǵy ult aspaptar orkestriniń kórkemdik jetekshisi jáne bas dırıjeri Rahat Bekboluly Mádireev, memlekettik «Serper» jastar syılyǵynyń ıegeri, QR Tuńǵysh Prezıdenti–Elbasy qorynyń laýreaty, Qurmanǵazy atyndaǵy Qazaq memlekettik akademıalyq halyq aspaptary orkestriniń bas dırıjery Abylaı Janbolatuly Tilepbergenov jáne Abyl Taraquly atyndaǵy ult aspaptar orkestriniń ártisi Ǵalıa Aqbergenqyzy Qojabergenova bar.
-Baıqaý úsh týrdan turdy, aqtyq synda 15-teı dombyrashy qaldy. Qazaq kúıiniń anasy – Dına sheshemiz ǵoı. Onyń atynda da qyz-kelinshekter konkýrsy bar. Qyzdar men er adamdardyń aralasyp jatqanynan góri bir erekshelik bolsyn dep qyz-kelinshekter arasynda uıymdastyryldy. Oryndaýshylardyń sheberligi óte joǵary deńgeıde, meniń jáne ákemniń kúılerin kúndelikti tyńdap júrgendeı naqyshyna keltirip oryndady. Konkýrs ótkizý ıdeıasy men 60 jasqa tolǵanda kelgen bolatyn. Biraq barlyǵy qarjyǵa qarap qalady ǵoı. Degenmen bıyl oblys basshysy Eraly Toǵjanov arnaıy qarjy bólip, baıqaýdy ótkizý múmkindigine ıe boldyq, - deıdi Roza Taımanqyzy.
Elimizdiń túkpir-túkpirinen bas qosqan dombyrashylar arasynda İİİ oryndy Qydyrsıhova Toǵjan (Almaty), Perdebekova Dıdar (Aqtaý), Úmbet Toǵjan (Astana), İİ oryndy Zınor Nuraı (Atyraý), Ábdýahap Symbat (Almaty), İ oryndy Bekenova Ánel (Almaty) men Aınur Sahýpova (Atyraý) qanjyǵalady. Al bas júldeni Qurmanǵazy atyndaǵy qazaq ulttyq konservatorıasynyń 2 kýrs stýdenti Nazerke Bazarbaeva enshiledi. Taıman Aıdarbaev atyndaǵy arnaıy júlde onyń kúılerin joǵary deńgeıde oryndaǵan Ábdýahap Symbatqa buıyrdy.
Baıqaý qatysýshylary arnaıy dıplommen marapattaldy. Jeńimpazdarǵa aqshalaı júldeler tabystaldy.
