Mańǵystaý oblysy elimizde alǵashqy bolyp analogty habar taratýdy óshirip, sıfrlyq efırlik telehabar taratýǵa kóshti. Saltanatty sharaǵa QR Aqparat jáne komýnıkasıalar mınıstri Dáýren Abaev, Mańǵystaý oblysynyń ákimi Eraly Toǵjanov jáne «Qazteleradıo» AQ Basqarma tóraǵasy Iskander Tájibekov qatysty.
Jıynda sóz alǵan QR Aqparat jáne komýnıkasıalar mınıstri Dáýren Abaev oblys turǵyndaryn quttyqtap, sıfrlyq efırlik telehabar taratýdyń artyqshylyqtaryna toqtaldy. «Shejireli Mańǵystaý oblysy tolyǵymen sıfrlyq telehabar taratýǵa kóshken elimizdegi eń alǵashqy aımaq. Mańǵystaýda sıfrlyq telehabar taratý úshin barlyq jaǵdaı jasalǵan. Sondyqtan Eraly Luqpanuly bastaǵan jergilikti ákimdik pen «Qazteleradıo» ujymyna atqarylǵan aýqymdy jumys úshin alǵys aıtamyn. Birinshiden, bul «Sıfrlyq Qazaqstan» baǵdarlamasyn júzege asyrýǵa baǵyttalǵan naqty qadamnyń biri.
Ekinshiden, osy qadam arqyly memlekettik aqparattyq qaýipsizdikti qamtamasyz etýge jol ashylady. Óıtkeni otandyq arnalardyń habar taratý úlesi men sapasy artqaly otyr. Úshinshiden, sıfrlyq habar taratýdy engizý qala men aýyl arasyndaǵy aqparattyq alshaqtyqty tómendetedi» - dedi Dáýren Abaev.
Óz kezeginde Mańǵystaý oblysynyń ákimi Eraly Toǵjanov sıfrlyq efırlik telehabar taratýǵa kóshý sheńberinde jasalǵan jumystardy qorytyndylap, jobany iske asyrý 2015 jyly aıaqtalǵanyn málimdedi. Habar taratýdyń jańa qalybynyń toqtaýsyz jumys isteýin qamtamasyz etý maqsatynda 21 radıotelevızıalyq stansıa qurylysy salynyp, jańǵyrtyldy, bul halqynyń sany shamamen 500 myń adamdy quraıtyn 47 eldi mekendi, ıaǵnı oblys halqynyń 99% qamtýǵa múmkindik beredi. Bul joba boıynsha 2014 jyly Jańaózen qalasy sıfrlyq efırlik telehabar taratý júıesine kóshti. Endi mine tolyqtaı jańa formatqa elimizde eń alǵashqy oblys bolyp Mańǵystaý ótýde. Oblysymyzda sıfrlyq telehabar taratý jelisiniń qamtý aýmaǵy 99%-ti qurady. Óńirimiz qazir analogtyq telehabar taratý jelisiniń óshirýge daıyn. 14 eldi meken jer erekshelikterine baılanysty sıfrlyq telehabar taratý júıesine tikeleı qosylý múmkindigi joq bolmasa da, biz aýyldardy «OTAU TV» jerseriktik telehabar júıesine qosý arqyly 100 % telehabar taratýmen qamtamasyz ettik», - dedi Eraly Toǵjanov.
«Qazteleradıo» AQ Basqarma tóraǵasy Iskander Tájibekov respýblıkanyń barlyq aýmaǵy boıynsha ınfraqurylymnyń sıfrlyq efırlik habar taratýǵa kóshýge daıyndyq barysy týraly habarlady. Tájibaevtyń málimetinshe, Sıfrlyq habar taratýǵa tolyqtaı kóshý úshin búkil elimiz boıynsha 827 radıotelevızıalyq stansıany paıdalanýǵa engizý kerek. Búgingi tańda 414 RTS salyndy. 2018 jyldyń aıaǵyna deıin taǵy 130 jýyǵyn aıaqtaý josparlanýda. Qalǵan stansıalar 2019-2020 jyldardaǵy kezeńde aıaqtalatyn bolady. Analogty habar taratýdyń tolyqtaı óshirilýi 2021 jyly iske aspaq.
