Shyǵys Qazaqstan oblysyndaǵy «Qazposhta» AQ-nyń fılıaly 9 aıdyń ishinde 4 satý núktesin ashqan. Bul týraly «Qazposhta» AQ Basqarma tóraǵasy Sáken Sársenov óziniń Facebook paraqshasynda jazdy.

Jergilikti fılıalda 10 qala men 15 aýdanǵa qyzmet etetin 1,5 myń adam jumys isteıdi. Buǵan qosa, aımaqta 752 aýyldyq eldi meken bar. Osynyń barlyǵyna ulttyq operatordyń mamandary óz qyzmetterin usynýda.

«Aımaqtaǵy bólimshe 9 aıda 4 satý núktesin, aıyrbas jasaýdyń qosymsha pýnktterin, 23 bankomat pen 11 termınaldy ashty. Al buryn bul jerlerde tólem qabyldaıtyn kasalar bolmaǵan edi», – dep atap ótti S. Sársenov.

Onyń aıtýynsha, SHQO-daǵy fılıal jergilikti ákimdikpen birlese otyryp, E-KSK jobasyn engizbekshi. Nátıjesinde, turǵyndar ózderiniń talap-aryzdaryn ákimdik pen turǵyn úı kooperatıvine joldaı alady. Sondaı-aq, halyqtyń qajettiligine jaraıtyn bir top qyzmetkerler árbir úıde bolmaq. Ol qyzmetkerlerdiń qataryna: ýchaskelik polıseı, medısınalyq qyzmetker, santehnık, elektrık jáne t.b. enedi.

Basqarma tóraǵasy bul óńirge sapary barysynda bıznesti júrgizip jatqan IT, HR jáne e-commerce-tiń basshylarymen kezdesip, áriptesterine kompanıanyń aldaǵy damý josparyn aıtty.

«Sondaı-aq, biz «Al-Farabı» JSHS-pen kezdesýimiz kezinde yntymaqtastyǵymyzdyń ári qaraıǵy damýyn talqyladyq. Aıtpaqshy, SHQO-da Qazposhtamen franchaızıńtik model boıynsha 6 kompanıa kelisimge otyrdy. Ol kompanıalar Semeı, Aıagóz, Óskemen jáne birneshe aýdandarda ornalasqan», – dedi ol.

Basqosý sońynda Qazposhtanyń 25 jyldyǵyna oraı eńbegi sińgen óńirdegi mamandarǵa dıplomdar men alǵys hattar tapsyryldy.