Taǵy da súıinshi, Alash urpaqtary! Parlament Májilisindegi «Aq jol» demokratıalyq partıasy fraksıasynyń, atap aıtqanda - onyń jetekshisi Azat Perýashevtyń Qarjy mınıstrligimen aradaǵy 2 jylǵa sozylǵan aıtys-tartysynyń nátıjesinde «Alash» ult-azattyq qozǵalysynyń, partıasynyń jáne Ulttyq Jerli Avtonomıasy úkimetiniń tóraǵasy Álıhan Bókeıhannyń 15-tomdyq jınaǵynyń qalǵan 12 tomyn (IV-XV tt.) ústimizdegi jyly 5 myń danamen basyp shyǵarýǵa qarajat bólinip otyr (Alash kóseminiń 1930 jj. «Fıgaro» fransýz gazetinde jarıalaǵan materıaldary men qazaqtyń jylqy sharýashylyǵy týraly ǵylymı ocherki ázirshe tabylǵan joq). IýNESKO «búkilálemdik shynaıy dańqty qaıratker» dep tanyǵan ult kóseminiń týǵanyna 150 jyl tolǵan mereıtoıy jylynda da (2016), ózi quryp basshylyq etken Alash Ulttyq Jerli Avtonomıasynyń 100-jyldyǵynda da (2017) «qarjy tapshylyǵynan» shyqpaı qalǵan teńdessiz tarıhı, ǵylymı, ádebı-pýblısıstik mura bıyl baspa kórmekshi. «Álıhan Bókeıhan. Shyǵarmalary – Sochınenıa» kóptomdyǵy Mádenıet jáne sport mınıstrliginiń «Mádenıet jáne óner salasyndaǵy básekelestikti joǵarylatý, qazaqstandyq mádenı murany saqtaý, zerdeleý men nasıhattaý jáne muraǵat isiniń iske asyrylý tıimdiligin arttyrý» baǵdarlamasy «Ádebıettiń áleýmettik mańyzdy túrlerin satyp alý, basyp shyǵarý jáne taratý» kishi baǵdarlamasy boıynsha jaryq kóredi.
Ókinishti ári sanaǵa qonbaıtyn bir jaıt: Á.N. Bókeıhan murasynyń alǵashqy İ-İİ tomdary 2016 jyly jeltoqsanda 2 myń danamen, 2017 jyly qańtarda kúshine engen jańa talap boıynsha 3-tomy sol jyldyń naýryzynda 5 myń danamen basylsa, al 4-15 tomdary da bıyl 5 myń dana bolyp shyqpaqshy. Iaǵnı I jáne II tt. 3 myń danaǵa kem bolyp qalatyn jaıy bar. 
Shymkenttegi saıası qýǵyn-súrgin qurbandary murajaıynyń burynǵy dırektory, aqyn Hanbıbi Esenqaraqyzy qurastyrǵan «Aq jol» (gazet). Kóptomdyq» jınaǵynyń qalǵan Hİ-HXV tt. da sonyń kebin kımekshi. Óıtkeni kóptomdyqtyń İ-H tt. sonaý 2015 jyly 2 myń danamen shyqqan bolsa, qalǵan 15 tomyn 3-4 jyl keshiktirip 5 myń danamen shyǵarý 2019 jylǵa ǵana josparlanyp otyr. Odan bólek dańqty Abylaı, Ábilmámbet, Sámeke handar men Baraq sultan áýletteri týraly 4-tomdyq tuńǵysh monografıa, Barlybek Syrttanulynyń murasy, N. Tórequluly, S. Qojanuldarynyń tańdamaly jınaqtary, HH ǵasyr basyndaǵy Qazaq ólkesi týraly aǵylshyn ınjeneriniń memýary, bas-aıaǵy 25 kitapty basyp shyǵarýǵa ótinim berildi.
Aıtqandaı-aq «Aq jol» jetekshisi A. Perýshaevtyń yjdahatymen kórnekti Alash qaıratkerleri Turaǵul Abaıuly, Ahmet (Ahmetǵalı) Mamytuly, Qajym Basymuldarynyń shyǵarmalary, zertteýleri, maqalalarynyń bir-bir tomdyq, Eldes Omarulynyń 3 tomdyq, sondaı-aq «HH ǵ. basyndaǵy qazaq tili jónindegi zertteýler» jınaqtary da 5 myń danamen baspa kóredi. Bul ǵylymı, ǵylymı-tanymdyq jınaqtardy A. Baıtursynuly atyndaǵy Til bilimi ınstıtýtynyń ǵalymy, fılologıa ǵylymdarynyń doktory, profesor Orynaı Jubaeva bastaǵan ǵalymdar toby tóte jazýdan kóshirip, óńdep, qurastyryp, ǵylymı túsinikteri men alǵysózderin jazyp usyndy. 
Dál osy kúni Almatydaǵy úlken baspahanamen kelisimshartqa otyryp, kitap basý jumysy qyzý bastalyp ta ketti.
Qoryta aıtsam, joǵaryda atalǵan kitaptar men jınaqtardyń barlyǵy «Aq joldyń» parlamenttik fraksıasynyń jetekshisi A. Perýshaevtyń kúsh-jigeriniń arqasynda jaryq kórmekshi. Soǵan baılanysty L.N. Gýmılóv atyndaǵy EUÝ «Alash» ınstıtýty men A. Baıtursynuly atyndaǵy Til bilimi ınstıtýtynyń ǵalymdary Azat myrzaǵa, atalǵan jınaqtardy basyp shyǵarýǵa qoldaý kórsetken Mádenıet jáne sport mınıstri A. Muhamedıulyna Alash qaıratkerleriniń sózimen «Táńiri jarylqasyn!» aıtady.