Aqtóbe oblysynyń ákimi Berdibek Saparbaevtyń tóraǵalyǵymen ótken jıynda jylytý maýsymyna daıyndyq jumystarynyń ózekti suraqtary qaraldy.

Energetıka jáne TKSH basqarmasynyń basshysy Dastan Amanov baıandaǵandaı, daıyndyq jumystary aıasynda bıyl oblys boıynsha 586 qazandyq, 238,9 shaqyrymdyq jylý jelileri, 482,3 shaqyrymdyq sýmen jabdyqtaý jáne sý tartý jelileri, 272,9 shaqyrymdyq elektrmen jabdyqtaý jelileri, 1 590 áleýmettik nysan men 2,5 myńnan asa kóppáterli turǵyn úıler jóndelgen.

- Otyn qoryna keler bolsaq, barlyq áleýmettik nysandardyń avtonomdy qazandyqtary kómirmen tolyqtaı qamtamasyz etildi. Oblys halqynyń kómirge degen qajettiligi 40 880 tonnany quraıdy. Búginde osy kólemniń úshten biri is júzinde jetkizildi, -dep málimdedi Dastan Amanov.

Sondaı-aq, komýnaldy kásiporyndardyń basshylary men aýdan ákimderi de beınebaılanys arqyly qysqa daıyn ekenderin jetkizdi.

Berdibek Saparbaev kómir jetkizýdi barynsha jyldamdatyp, qatty otynnyń kem degende aılyq qoryn qamtamasyz etýdi tapsyrdy.

- 15 qazanǵa qaraı barlyq nysandar men qyzmet kórsetý oryndary jylý berýge tolyqtaı daıyn bolýlary kerek. Sondaı-aq, osynda otyrǵan monopolıs kompanıalardyń ókilderine aıtarym: Elbasynyń tapsyrmasy bar – ózderiniń ınvestısıalyq mindetterin tarıfke qosatyndardan suranys qatty bolady. Óz mindetterińizge aldyńyzdar ma – tutynýshylarǵa ysyrmaı, ózderińiz oryndańyzdar, - dep atap ótti oblys ákimi.

Jalpy, Aqtóbe oblysynda jylytý maýsymyna daıyndyq jumystary shtattyq tártipte ótýde.