Aqtóbe oblysynda jylý berý maýsymynyń bastalýy óńir basshysy Berdibek Saparbaevtyń erekshe baqylaýynda.

11 qazan, beısenbi kúni oblys ákimi Aqtóbe qalasyn jumys babymen aralaǵan kezinde «Nur Aqtóbe» turǵyn úı alabyndaǵy tirshilikti qamtamasyz etý nysandarynyń qyzmetin tekserdi. Munda Berdibek Saparbaev ortalyq qazandyq pen qosymsha 96 Gkal jylý óndirý úshin ony keńeıtý boıynsha qurylys jumystarynyń barysymen tanysty.

Qazandyq keńeıtilgen soń onyń jalpy qýattylyǵy 156 Gkal-ge deıin óspek, bul «Nur Aqtóbeniń» qazirgi tutyný deńgeıinen asady. Quny 1,6 mlrd. teńge turatyn jobany júzege asyrý jumystary ótken jyldyń qarasha aıynda bastaldy. Onyń qajettiligi turǵyn úı alabynyń damýyna jáne turǵyndar sanynyń artýyna negizdelgen. Oblys ákimi «Kazteploenergomontaj» TS merdiger mekemesiniń basshysy Almas Ysmaǵulovpen áńgimelesý kezinde jańa qazandyqty osy jylǵy 15 qarashaǵa deıin paıdalanýǵa berýdi tapsyrdy.

- Aqtóbelikterde jylýmen problema bolmaýy kerek, - dep atap ótti Berdibek Saparbaev qala basshylyǵy men komýnaldyq kásiporyndar ókilderine qarata aıtqan sózinde.

Sondaı-aq, oblys basshysy «Vostochnaıa» jáne «Aqjar-2» qosalqy beketteriniń keńeıtý jáne qurylys jumystarymen tanysty. Jobalardy júzege asyrý senimdilikti arttyryp, «Nur Aqtóbe» turǵyn úı alaby turǵyndaryn úzdiksiz energıamen jabdyqtaýdy qamtamasyz etedi. Budan basqa, Berdibek Saparbaev Aqtóbede tuńǵysh ret salynyp jatqan múmkindigi shekteýli jandarǵa arnalǵan jedelsatysy bar jerasty jaıaý júrginshiler jolyn qarap shyqty. Olar qalanyń eń úlken kólik arterıalarynyń biri - Á.Moldaǵulova dańǵyly boıyndaǵy «DSK» jáne «Álıa» avtobýs aıaldamalarynyń janynda ornalasqan. Atalmysh nysandardy salý qajettiligi ıntensıvti kólik qozǵalysy saldarynan týǵan. Óıtkeni dańǵyldyń kólik júretin joldary - alty jolaqty. Árbir kópirdiń uzyndyǵy 32 metr, bıiktigi – 6 metr. Ǵımarat ishi jaıaýjol taqtalarymen jabylyp, áınekti polıkarbonat qorshaýmen jabylǵan jáne qozǵalys áserinen janatyn aqyldy jaryqtandyrý júıesi ornatylǵan. Eki nysannyń da qurylysy aıaqtalyp qaldy,

qurylysshylar metal qurastyrylymdardy boıaý jumystaryna kóshti.

Búgin oblys ákimi tuńǵysh «Baspasóz úıinde» de boldy. Bul ishi keń, kúrdeli jóndeý jumystary júrgizilgen úshqabatty ǵımarat. İshinde baspahana, oblystyq gazetter men jýrnaldardyń ujymy, baspasóz ortalyǵy ornalasqan. «Atameken» kásipkerler palatasymen birge ǵımarat ishine qaladaǵy shaǵyn jáne orta bıznesti damytý úshin bıznes-ınkýbatordy ornalastyrý josparlanyp otyr. Berdibek Saparbaev jumys kabınetterin, qosalqy jáne tehnıkalyq bólmelerdi qarap shyǵyp, baspasóz murajaıyn ashý josparymen, jaqyn mańdaǵy aýmaqtardy, sonyń ishinde jýrnalıser aleıasyn abattandyrý jumystarymen tanysty.