Bul týraly Óńirlik komýnıkasıalar qyzmetinde ótken baspasóz konferensıasynda Aqtóbe oblysy kásipkerlik basqarmasynyń basshysy Anar Darjanova málimdedi.

Onyń aıtýynsha ónimdi jumyspen qamtý jáne jappaı kásipkerlik baǵdarlamasy aıasynda kásipkerlik basqarmasy "Damý" qorymen birlesip, Aqtóbe qalasy men Hromtaý qalasynyń kásipkerlerin shaǵyn nesıemen qamtýdy arttyrý boıynsha sharalar qabyldanýda.

Osyǵan baılanysty 17 qazan kúni Hromtaý qalasynda ashyq esik kúnin ótkizý josparlanýda.

«Aǵymdaǵy jyly úsh jyldan aspaıtyn merzimge tirkelgen Aqtóbe jáne Hromtaý qalalarynyń jumyssyz jáne isin jańa bastaǵan kásipkerlerine shaǵyn nesıe berý úshin respýblıkalyq jáne oblystyq búdjetten 1 mlrd teńgeden astam qarjy bólindi. Bul jumys «Eńbek» baǵdarlamasy boıynsha júzege asyrylýda. Kásipkerler bolashaǵy bar perspektıvti jobalarymen «Damý» qoryna júgine alady. Osy maqsatta 17 qazan kúni Hromtaý qalasynda ekinshi deńgeıdegi bankter jáne «Aýyl sharýashylyǵyn qarjylaı qoldaý qory» AQ AF men «Agrarlyq nesıe korporasıasy» AQ AF qatysýymen ashyq esik kúni ótedi», - dedi Anar Darjanova.

Baǵdarlama aıasynda týyndaǵan máselelerdiń jolyn sheshý úshin, jańa jumys oryndaryn ashý maqsatynda kásipkerlerdi kepildendirý tetigi «Damý» kásipkerlikti damytý qory AQ AF júzege asyrylady. İsin jańa bastaǵan kásipkerler úshin kepildik mólsheri shaǵyn nesıe qunynyń 85% – na deıin, al jumys istep turǵandar úshin-50% - ǵa deıin quraıdy.