Almatydaǵy tanymal sırk ártisiniń ólý sebebin san-saqqa júgirtken áleýmettik jeli qoldanýshylary jaýapqa tartylýy múmkin. Marqum Qasym Jumaǵojınniń týystary men áriptesteri osyndaı málimdeme jasady. Bul týraly Astana arnasynyń jańalyqtarynda aıtyldy.
Ótken senbide qaladaǵy túngi klýbtardyń birinde shoý-baǵdarlama kezinde qaıtys bolǵan kaskaderdiń ólimine qatysty polısıa birneshe sot-medısınalyq saraptama taǵaıyndady. Aldyn ala boljam boıynsha gımnastıka sheberi júrek talmasynan qaıtys bolýy múmkin. Marqum 5 qarashada jer qoınaýyna berildi.
Almatydaǵy túngi klýbtardyń birinde ajal qushqan sırk ártisiniń ólimine qatysty alyp-qashpa áńgime áli kúnge deıin basylmaı tur. Ásirese, áleýmettik jelilerde bul oqıǵany san-saqqa júgirtip jatqandar jetedi. Oıyn-saýyq klýbynda túsirilgen myna kadrler qazir ǵalamtordy sharlap ketti. Instagramda paıda bolǵan beınejazbada beti qan-qan, aq kıimdegi adamnyń sulbasy jipke asylyp tur. Kýágerlerdiń aıtýynsha, bul senbi kúni qaıtys bolǵan kaskader Qasym Jumaǵojınniń ózi. Muny sırk ártisiniń áriptesteri de rastady.
«Bázbireýler jazyp jatqandaı, fotoda nemese vıdeoda kórsetilgen arqan onyń moınyna baılanyp turǵan joq. Ol kostúmniń bir bólshegi ǵana. Ony kıiminen arnaıy ilgek ustap turady. Qasym densaýlyǵyna eshqashan shaǵymdanbaǵan. Biraq, kaskader bolý stress pen júrekke qatty salmaq salatyn kásiptiń túri ekenin eskergen jón», - «NOMAD STUNTS» tobynyń PR menedjeri Evgenıa Lı.
Qasymnyń áriptesteri ártis bıiktikten jerge túsirilgen sátte de tiri bolǵanyn aıtyp otyr. Ol ózin jaısyz sezingen soń, oıyn-saýyq keshine jınalǵandar jedel járdem qyzmetin shaqyrǵan. Biraq dárigerler kásibı sırk ártisiniń sol jerde qaıtys bolǵanyn anyqtapty.
Qasym Jumaǵojın - tájirıbeli kaskader. Ol «Nomad Stunts» tobynyń quramynda Qazaqstannan tys Gollıvýd kınolary men Reseı týyndylarynda kásibı trúkter oryndaýshlyǵymen tanymal. Gımnastıkadan sport sheberi 3 qarashada «Helloýın» merekesine oraı shoý-baǵdarlamaǵa shaqyrtý alǵany belgili boldy. Zańger Sergeı Ýtkınniń aıtýynsha kaskader keshke jaldanbaly túrde kelse, klýb ákimshiligi jaýapqa tartylmaýy múmkin.
«Menińshe, klýb pen bul ártistiń arasynda jazbasha kelisim-shart bolǵanyna nazar aýdarý kerek. Eger, ol jeke ózi jaldanyp qyzmet kórsetse, klýb úshin jaýapkershilik az bolady. Al, eńbek kelisim-shartymen jumys istep júrse, bul ólimge oraı oıyn-saýyq keshenin tolyqtaı jaýapqa tartýǵa bolady. Sebebi, mundaı jumysqa tartylǵandardyń ómiri saqtandyrylýy kerek», - dedi zańger Sergeı Ýtkın.
Dese de, Almaty qalalyq polısıa departamenti bul is boıynsha tergeýdiń jan-jaqty júrip jatqanyn málimdedi. Keshendi sot-medısınalyq saraptama qortyndysynan soń ólimniń naqty sebebi anyqtalmaq.
Marqumnyń jary da arnaıy úndeý jarıalaǵan edi. Ol ártisti «Asylyp óldi», «Bireý qylqyndyrdy» nemese «Saqtandyrý quraldary istemegen» dep daqpyrt taratqandardy sotqa beretinin málimdedi. Onyń oıynsha, Qasym Janǵojın júrek talmasynan qaıtys bolǵan.
