Aqtóbe oblysynyń ákimi Berdibek Saparbaev Alǵa aýdanyna jumys sapary kezinde Marjanbulaq aýylyndaǵy aýylishilik gaz taratý jelilerin iske qosýǵa qatysty.
Belgili bolǵandaı, Marjanbulaq aýylyna tórt jyl buryn gaz kirgizilgen. Alaıda sol ýaqyt aralyǵynda Aqtóbeden 15 shaqyrym jerde ornalasqan aýylda jańa eki - Batys jáne Shyǵys turǵyn úı alaptary paıda boldy. Sol eki turǵyn úı alabyna 3 qazan, sársenbi kúni gaz berildi. Myńǵa jýyq jeke turǵyn úı men toǵyz áleýmettik nysanǵa kógildir otyn barý úshin barlyǵy 28,5 myń metrden asa qubyr júrgizilgen. Joba quny 290 mln teńgeden asady.
- Memleket basshysynyń saıasaty azamattardyń ál-aýqatyn jaqsartýǵa, árbir qazaqstandyq otbasyn baspanamen qamtamasyz etýge baǵyttalǵan. Bul sizdiń aýyldyń mysalynda aıqyn kórinedi: nebári tórt jyl buryn osy jańa ǵımarattardyń ornynda tek dalalyq bolatyn, al búginde komýnıkasıalarmen qamtamasyz etilgen zamanaýı dańǵaradaı úıler tur. Aýmaqty kógaldandyryp, abattandyrý jaıyn da umytpaýlaryńyzdy suraımyn. Aýylǵa jańa mektep kerek ekenin bilemiz. Bilim basqarmasyna tıisti tapsyrma berilgenine kóp boldy, qujattary ázirlenip jatyr, - dedi turǵyn úı alaptarynyń turǵyndarymen tildesken oblys ákimi.
Alǵa aýdanynyń Qaraqudyq aýylynda oblys ákimi aýyz sýmen qamtamasyz etý júıesiniń saltanatty ashylýyna qatysty. Joba quny 556 mln teńge. Úsh sorǵylaý stansasy ornatylyp, 11 myńnan asa qysymy joǵary sý qubyry, 10 myńǵa jýyq turǵyn úılerge sý tartatyn qubyrlar júrgizildi. Aýylda barlyǵy 1600 adam turady. Budan basqa, oblys ákimi jumys sapary kezinde aýyl sharýashylyǵynyń dástúrli emes túrlerimen aınalysatyn sharýa qojalyqtarymen tanysty. Olardyń qatarynda, eshki sútin shyǵaratyn «Marjanbulaq-A» JSHS bar. Sharýa qojalyǵy osy jyldyń sáýir aıynda «Sybaǵa» memlekettik baǵdarlamasy aıasynda Golandıadan elý analyq jáne eki atalyq eshki malyn satyp aldy. Janýarlar kóktemnen bastap jersindirilip, endigi tóldedi de. Qazirgi tańda 34 laq bar, taǵy 16 laq tóldeıdi dep kútilýde. Eshki súti naryqqa pasterlengen kúıde shyǵarylady dep josparlanyp otyr. Arnaıy jabdyq jolda kele jatyr, - dedi JSHS dırektory Andreı Tekebaev.
- 800 basqa deıin kóbeıtemiz. Bizde 220 gektar jaıylym jerimiz bar. 16 gektar jer sút shyǵarý jáne óńdeý keshenine berildi. İrgetasy quıylyp qoıdy. Eshki saýatyn jáne tóldeıtin zaldar bolady, - dedi Andreı Tekebaev.
Aqsaı aýyldyq okrýginde óńir basshysy mal jáne egin sharýashylyqtarymen qatar aınalysyp otyrǵan «Abylaı» sharýa qojalyǵynda boldy. Búginde qojalyq 500 bas jylqy, 800 bas iri qara mal ustaıdy, qymyz shyǵaryp, 17 gektar sýarmaly jerge kartop, sábiz, qıar, qarbyz, qaýyn egedi.
Qojalyqtyń basty problemasy - jumysshylar jetispeıdi.
- Mehanızatorlar, baqtashylar joq. Aýylda jumyssyzdar az emes, biraq olar mal baǵyp, aýyl sharýashylyǵy tehnıkasymen jumys istegileri kelmeıdi. Úlken problema osy bolyp otyr. Eńbekaqylary da jaman emes sıaqty – 50 myńnan 100 myńǵa deıin. Syrttan adam jaldaýǵa týra keledi. Qazirgi tańda mende ózge oblystan kelip eńbek etip jatqandar bar, - dep bólisti sharýa qojalyǵynyń dırektory Qydyrbaı Ksýpov óńir basshysymen áńgimesinde.
