Polshada zeınetke shyǵý jasy qysqardy

/uploads/thumbnail/20180108164359216_small.jpg

1 qazanda Polshada zeınetke shyǵý jasyn 7 jylǵa qysqartý týraly zań qabyldandy, dep habarlaıdy Qamshy.kz aqparat agenttigi inforesist.org-qa silteme jasap. Endi Polshada er adamdar 65 jasynda, áıelder 60 jasynda zeınetke shyǵady. Osylaısha Úkimet Donald Týskanyń 2012 jylǵy zeınetkerlik jasqa qatysty reformasyn joıdy.

Eýropa tájirıbesine súıene otyryp zeınetke shyǵý jasyn uzartqan Qazaqstan úkimeti Polshanyń osy bir áreketin esepke alsa eken degen tilek bar.

«Polsha úkimeti poláktarǵa tańdaý quqyǵyn berip otyr. Eger bireý uzaǵyraq jumys istegisi kelse, marhabat. Zeınet jasyn er adamdar úshin 67-den 65-ke, áıelderge 67-den 60-qa qysqarta otyryp, jerlesterimizge tańdaý berip otyrmyz», - deıdi Polsha úkimetiniń basshysy Beata Shıdlo.

Onyń sózinshe zeınetaqy jasyn burynǵy mejege qaıta belgileý úshin el búdjetinde qarjy jetkilikti. Polshanyń áleýmettik saqtandyrý qory (ZUS) bankrotqa ushyramaıdy. Onda qarjy jetkilikti.

Shıdlo «Quqyq jáne Ádildik» (PiS) partıasynyń 2015 jyly saılaýda «zeınetaqy jasyn qysqartamyz» dep bergen ýádesin oryndaǵanyn jetkizdi. Onyń sózinshe, 2012 jyly zeınetaqy jasyna qatysty qabyldanǵan reforma poláktardy óle ólgenshe eńbekke jegip qoıdy.

Polshanyń vıse-premer-mınıstri men damý mınıstri Mateýsh Moraveskııdiń málimetinshe, 2018 jyly zeınetke shyǵý jasyn qysqartý úshin el búdjetine 10 mıllıard altyn (2,7 mıllıard dollardan astam) quıyldy. Polshada 2019 jyly 330 myń adam zeınetke shyǵady.

Aıta keteıik, Qazaqstanda da zeınetke shyǵý jasy uzartylǵan bolatyn, 2018 jyly er adamdar 63 jasynda, al áıelder 58,5 jasynda shyǵý kerek. 2027 jylǵa deıin 63 jasqa jetkenshe zeınetaqy jasy jylda jarty jylǵa uzartylyp otyr.