Prokýratýra 1-synyp oqýshysy İnjý Jankınanyń ólimine qatysty tekserý, tergeý amaldaryn óz baqylaýyna aldy.  Aktobenews.kz-tiń málimetine sáıkes, tekserý jumystarynan keıin is sotqa joldanýy múmkin, dep jazady Qamshy.kz aqparat agenttigi. 

«Beınematerıal shyqqan soń prokýratýra tekserýge tapsyrma berdi. Oblystyq densaýlyq saqtaý basqarmasy komısıasynyń, táýelsiz komısıanyń tekserýinen soń qorytyndy materıal prokýratýra, sotqa jiberiledi. Oqıǵa prokýratýranyń baqylaýynda tur. Jaýapty adamdar jumystan shyǵarylady», — dedi oblystyq densaýlyq saqtaý basqarmasy basshysynyń orynbasary Svetlana Esenamanova.

Aıta keteıik, áleýmettik jelide vıdeo tarady. Onda jedel járdemniń 40 mınýtta biraq kelgeni aıtylady.

♦ Jedel járdem 40 mınýtta kelemin degenshe kishkentaı qyz óldi

7 jastaǵy İnjýdiń anasy Dınara Baımaǵambetova  nur.kz-ke bergen suhbatynda qyzdyń denesi 39,6-dan túspeı qoıǵanyn jetkizdi.

"Sol kúni tańda qyzym sergek júrdi. 3 qarasha demalys kúni bolatyn. Qyzymnyń qyzýy kóterile bastady. Qyzýy tústiń kezinen bastap 39,6-dan túspeı qoıdy. Men ony óledi dep oılaǵan joqpyn. Ol dáriger kelgenshe jata turaıyn dep kúlip jatty. Sol kúlip jatyp talyp qaldy", - deıdi anasy.

Dına Baımaǵambetova kóp balaly ana. Onyń osymen ekinshi qyzy qaıtys bolypty.

Esterińizge sala keteıik, oqıǵa 3 qarashada «Nur Aqtóbe» aýdanyndaǵy turǵyn úılerdiń birinde bolǵan.