Qazaqstannyń Syrtqy ister mınıstrligi ekonomıkalyq jáne saýda dıplomatıasy baǵytyndaǵy qarym-qatynasty jaqsartý maqsatynda eldegi dıplomatıalyq ókildermen baılanysty nyǵaıtýda. Osyǵan oraı, mınıstrlik respýblıkada árntúrli jaǵymdy ıgi sharalardy júzege asyrý ústinde.

 Osyndaı ıgi sharalardyń biri keshe Qazaqstan Syrtqy ister mınıstrliginiń uıymdastyrýymen júzege asty.

Atap aıtar bolsaq, Syrtqy ister mınıstrligi shetel dıplomatıalyq mısıalarynyń jáne Astana qalasynyń mektep-gımnazıalarynyń qatysýymen «Jas Diplomat» biregeı jobasyn iske qosty. İs-shara memleket basshysynyń «Rýhanı jańǵyrý» baǵdarlamasy aıasynda syrtqy saıası vedomstvonyń bastaýymen Bilim jáne ǵylym mınıstrliginiń, elorda ákimdiginiń jáne BUU modeli úılestirýshi ortalyǵynyń qoldaýymen qolǵa alynyp otyr.

Joba sheńberinde Astana qalasynyń memlekettik mektepteri men sheteldik dıplomatıalyq mısıalar arasyndaǵy yntymaqtastyq kózdelgen. Osy jylǵy qarasha-jeltoqsan aılarynda mektep oqýshylaryna dıplomatıalyq qyzmettiń qyr-syryn tikeleı dıplomattardyń ózderinen bilýge múmkindik beretin túrli is-sharalardy ótkizý josparlanǵan. Joba avtorlarynyń paıymdaýynsha, oqýshylar ózderi jumys jasaǵan sheteldik dıplomattardyń elderiniń atynan sóz sóılep, BUU modeline sáıkes «Bolashaq energıasy» taqyrybynda otyrys ótkizedi.

İs-sharada sóz sóılegen Qazaqstan Syrtqy ister mınıstriniń orynbasary Roman Vasılenko sheteldik elshilikter men mektep-gımnazıalarǵa osy jobaǵa qatysýǵa kelisim bergenderi úshin alǵys bildirip, jobanyń óskeleń urpaqtyń oı-órisiniń keńeıýine aıtarlyqtaı úles qosatynyn atap ótti.

«Ótkizilip otyrǵan is-sharanyń Memleket basshysynyń Qazaqstan halqyna joldaýynda «Jastar jyly» bolyp jarıalanǵan 2019 jyldyń qarsańynda iske qosylýynyń mańyzy erekshe», - dedi R. Vasılenko.

Atalǵan jobaǵa 7 memlekettiń - Brazılıa, Germanıa, Grýzıa, Koreıa, Polsha, Túrkıa jáne Japonıa elshilikteri jáne elordalyq №3, №4, №5, №6, №48, №75 ı №81 mektep-gımnazıalary qatysýǵa kelisim berdi.

Erkin QALDAN