Almatyda Abaı dańǵylyn uzartý kezinde qurylys alańynda gaz qubyryn aýystyrý jumystary aıaqtaldy. Ondaǵy joǵary qysymdy jeliler taǵy da eki metrge tereńdetildi. 

Qurylys barysynda Naýryzbaı aýdanynyń 4 myńnan astam abonenti gazdan ajyratylǵan edi. Jergilikti turǵyndar keltirilgen qolaısyzdyqqa túsinistikpen qarady.

«Metro salsa, árıne, qolaıly bolar edi. Asyǵa kútip júrmiz. Keıde jaryqty, keıde gazdy óshirip tastap júr, shydaýǵa tyrysamyz», - degen qart turǵynnyń sózin kelesi bir turǵyn: «2-3 saǵat jaryqty óshirdi, 2 kúndeı gaz bolmady. Biraq barlyǵyna túsinistikpen qarap jatyrmyz. Úıimizdiń janynda metro bolǵany ózimizge de yńǵaıly», - dep tolyqtyrdy.

Al Alataý aýdanynyń Rysqulov dańǵylyndaǵy aqaýy bar qubyrlardy jóndeý jumystary shuǵyl túrde júrgizildi. Mamandardyń aıtýynsha, mundaı sheshim qabyldamasa qystyń kózi qyraýda kóptegen keleńsizdikter týǵyzar edi. Gaz qubyrlaryn aýystyrý kezinde «Shańyraq», «Ójet» jáne «Rahat» yqshamaýdanynyń turǵyndary kezeń-kezeńimen kógildir otynnan ajyratyldy. Degenmen, komýnaldyq qyzmet ókilderi jyl sońyna deıin esh turǵynnyń gazdan ajyratylmaıtynyn alǵa tartty.  

«Alataý aýdanynda joǵary qysymdy gaz qubyrynyń klapany jarylyp, eki kún boıy 8 myńnan astam úı gazsyz otyrdy. Aqaýdy ornyna keltirý jumysyn «QazTransGaz Aımaq» mekemesi júzege asyrdy. Reseı Federasıasynan klapan tapsyrys berildi, óıtkeni mundaı klapan Qazaqstanda joq», – dep túsindirdi Almaty qalasy Energetıka jáne komýnaldyq sharýashylyq basqarmasynyń bas mamany Ábil Aldıar.