Almatydaǵy eski úılerdiń jartysy Túrksib aýdanynda ornalasqan. Aldaǵy ýaqytta eki qabatty 16 úı súrilse, paıdalanýǵa beriletin baspana sany 4 esege kóbeıedi. Al «Óńirlerdi damytý-2020» baǵdarlamasy boıynsha «Jas qanat» yqshamaýdanynda 47 turǵyn úı boı kóterdi. Jyl aıaǵyna deıin 90 otbasy jańa páterde qonys toıyn toılaıdy.

Almaty qalasynyń Túrksib aýdanynda eski úıdi súrý baǵdarlamasy boıynsha nátıjeli jumystar atqarylyp jatyr dedi aýdan ákimi. Baǵdarlamany iske asyrý úshin aýdan 4 aýmaqqa bólingen. Osy arqyly súrý men qurylys jumystary kezeń-kezeńimen júrgiziledi. Onyń alǵashqysy keler jyldyń birinshi toqsanynda bastalady dep josparlanyp otyr. Kezekte ekiqabatty 16 eski úı tur. Olardyń ornyna 800 páterdi qamtıtyn 40 jańa úı boı kóteredi.

«Barlyq shara kelisim arqyly júrgiziledi. Kelisim bolmasa sot arqyly sheshiledi de, eski úıler súriledi. Qazir tıisti jumystar istelip jatyr. Joba bar, keler jyldyń birinshi toqsanynda, meniń oıymsha, jańa úıdiń qurylysy bastalady», – dedi Almaty qalasy Túrksib aýdanynyń ákimi Pavel Kýlagın.

Aýdan ákiminiń aıtýynsha Túrksibtegi qordalanǵan máselelerdiń deni jańadan qosylǵan aýmaqtarda eken. Jaryqtandyrý, gaz júrgizý, ınfraqurylymdy jaqsartý, zańsyz qurylysty joıý jumystary júrgizilýde. Qazirdiń ózinde 370 kóshege sham ornatylyp, 3 jerasty ótkeli paıdalanýǵa berilgen. «Almaty-1» temir jol vokzaly aldyndaǵy alań da kóriktendirildi. Eki aptadan soń qoǵamdyq kólikterge arnalyp aıaldamalar qoıylady. Al keler jaly aýdan tolyqtaı kógildir otynmen qamtylmaq.

«Jeke turǵyn úı sektorynda birneshe úıler kógildir otynmen qamtylýy tıis. Olardyń deni magıstraldy jelilerden alshaq ornalasqan. Olardy bıyl qamtyp úlgermeımiz. Biraq keler jyldyń birinshi jartysynda aýdandaǵy barlyq úılerge gaz júrgiziledi», – dedi Pavel Kýlagın.

9 aıdyń kórsetkishi boıynsha aýdanda barlyq salada oń nátıje baıqalǵan. 30 mıllıard teńgege jýyq ınvestısıa tartylyp, shaǵyn jáne orta bıznes mekemeleriniń sany 102 paıyzǵa artypty. Bas-aıaǵy 7 myńǵa jýyq kásipker paıda kórýde. Jyl basynan beri 3 myń jańa jumys orny ashylǵan. Olardyń sany jańa áýejaı termınaly salynsa, taǵy eselenbek.  

«Qazir jańa áýejaı termınalynyń syzbalyq jumystaryna halyqaralyq konkýrs jarıalandy. Jaqyn arada siz ben biz sol jobamen tanysamyz dep oılaımyn. Kópshilik nazaryna usynylady. Ázirlenip jatqan joba boıynsha qazirgi áýejaıdyń oń jaǵynda bos aýmaq tańdalyp, tıisti jumystar júrgizilip jatyr», – dedi Almaty qalasy Túrksib aýdanynyń ákimi.

Aýdanda jańa balabaqsha, múgedekterge arnalǵan psıhonevrologıalyq ınternat úıi jáne medısınalyq mekemeler salynyp jatyr. Aýlalardy kóriktendirý men onyń qaýipsizdigine de den qoıylýda. Qazir 4000 beınebaqylaý kameralary ornatylǵan.